Áður auglýst opið hús í Setrinu verður haldið laugardaginn tíunda september.  Gott tækifæri til að fá sér bíltúr og skoða breytingarnar á skálanum, skálanefndarmenn kynna breytingar á ljósavélarmálum skálans ásamt því að sýna afrakstur vinnu sumarsins.  Boðið verður upp á kaffi og vöfflur ásamt því að þeir félagsmenn sem mæta gista frítt á laugardeginum.  Stofnaður verður spjallþráður þar sem þeir sem hyggjast mæta eru beðnir um að tilkynna komu sína og skrá fjölda gesta eða hringja í undirritaðann í síma 844-5010 eða 893-6560.  Hittumst og eigum góða stund saman, grillið góða verður á sínum stað til afnota fyrir alla sem mæta.

F.h. skálanefndar.  Logi Már.

Fyrirhuguð er vinnuferð Skálanefndar í Setrið 12 – 14 ágúst. Meðal verkefna er að bera á pallinn við Setrið, mála glugga að innan, mála þakið á Zetunni ásamt öðrum tilfallandi verkefnum. Skráning verður á spjallþræði og verður að skrá sig fyrir fimmtudag. Stefnt er að leggja af stað seinnipart föstudags og heimkoma seinnipart sunnudags.

Skálanefnd 

Sælt veri fólkið.

Skálanefnd hefur staðið í ströngu undanfarið og farið upp í Setur í vinnuferðir þrjár helgar í röð.  Höfum við félagarnir lengt helgarnar og verið að fara á fimmtudagskvöldum og náð tveimur heilum vinnudögum út úr helginni.  Aðra helgina í júlí var farið í að mála þak og kláraðist það en mála þarf þakið á Setunni og verður væntanlega reynt við það í vinnuferðinni í ágúst. Einnig var byrjað að rífa innan úr vélarrými gámsins og byggja það upp að nýju.  Þriðju helgina í júlí var haldið áfram með vélarrýmið og farið í að leggja miðstöðvakerfið fram á klósett og voru rafmagnsofnarnir sem þar voru teknir  niður og venjulegir settir í staðinn og tengdir kerfinu frá kamínunni.  Nokkuð mál var að koma bakrásinni fyrir og þurfti að taka hana undir húsið með tilheyrandi greftri og veseni en hafðist að lokum.  Kerfið var einnig tæmt og kamínan var tekin í bæinn og yfirfarin inni í Funa og reykrörið frá henni lagfært.   Um síðustu helgi var svo almenn vinnuferð en mæting almennra félagsmanna  var mjög dræm  og mætti einn með okkur á fimmtudagskvöldið og tveir komu seinnipartinn á laugardegi.  Þó náðist að setja kamínuna upp og klára miðstöðvakerfið og koma hita á húsið aftur.  Nýja rafstöðin okkar fór einnig uppeftir á fimmtudagsnóttina, við fengum hana afhenta eftir breytingu hjá fyrirtækinu Hafás milli átta og níu á fimmtudagskvöldið og var hún sett beint á klúbbkerruna og keyrð uppeftir.  Var hún átta til níu vikum á eftir áætlun vegna tafa á afhendingu frá framleiðanda.  Það ber að taka fram að Vélasalan kom einstaklega vel fram við okkur í þessu máli og kom vel til móts við okkur vegna tafanna sem þeir sjálfir áttu þó enga sök á.  Hafist var handa við að koma vélinni inn í vélarrýmið á föstudagsmorgunn og var hún komin á sinn stað fljótlega upp úr hádeginu og byrjað að ganga frá staðsetningu og tengingum.  Á laugardagskvöldið var svo tekið „test run“ á hana og virkaði allt sem virka þurfti, eftir er samt að fínstilla hlutina.  Pústkerfi var tengt til bráðabirgða, eftir er að ganga endanlega frá því og einnig að ganga frá kælirörum sem annars vegar taka inn kalt loft og hins vegar taka heita loftið frá vélinni og koma því út.  Þegar allt verður frágengið verður vélin keyrð í lokuðu rými þ.e. hurðin á gámnum skal höfð lokuð.  Rýmið sem hún er í hefur nú einnig verið hljóðeinangrað svo sem tök eru á.  Reiknað er með að gegnið verði frá því sem eftir er að ganga frá í vinnuferðinni tólfta til fjórtánda ágúst og þá verði vélin tilbúin til notkunar.  Einnig má geta þess að sökkul skálans sem snýr að aðkeyrslu hans hefur nú verið klæddur með pallaefni og er nú ásjóna hússin öll önnur þegar komið er að því.  Fyrirhugað er síðan að hafa opið hús í Setrinu og kynna félagsmönnum þær breytingar sem gerðar hafa verið á skálanum og bjóða upp á vöfflur að hætti hússins og fría gistingu en það verður auglýst nánar síðar. Við í nefndinni viljum þakka þeim aðstoðina sem þó hafa komið að starfinu með okkur í sumar.

Logi Már.  Skálanefnd Seturs.

Nú fer að líða að fyrstu vinnuferð Skálanefdar og óskum við eftir vinnufúsum höndum í þau fjölmörgu verkefnum sem liggja fyrir.

1. vinnuferð er áætluð 22 – 24 júlí.
2. vinnuferð er áætluð 12 – 14 ágúst.

Skráning verður á spjallinu þegar nær dregur. Endilega takið þessar helgar frá.

Jón Emil Skálanefnd 

Skálanefnd Seturs óskar eftir upplýsingum frá félagsmönnum um hvort einhver gæti lumað á lítilli dísilrafstöð þetta fjögur til fimm kílóvött sem við getum fengið leigða eða lánaða til að halda vatni og ljósum á skálanum þar til nýja ljósavélin kemur í hús.  Allar upplýsingar vel þegnar og má koma þeim á framfæri við skálanefndarmenn í gegnum póstfangið  skalanefnd@f4x4.is  eða í síma skálanefndar, 844-5010.

Skálanefnd.

Látin er í Setrirnu, Deutz Ligthmotor.   Deutz Ligthmotor var fædd í Þýskalandi í kringum miðja síðustu öld en flutti fljótlega til Íslands og hóf störf hjá Landssímanum sem þá var og starfaði þar megnið af sinni starfsævi sem varaaflgjafi við góðan orðstý en lét síðan af störfum þar á seinni hluta ævinnar og hóf störf sem raforkustjóri í Setrinu, skála Ferðaklúbbsins 4×4.  Stóð jafnan nokkur styrr um störf hennar á þeim vettvangi.  Deutz Ligthmotor var jafnan heilsuhraust en á síðustu árum ævinnar tók að bera á ýmsum krankleikum í heilsufari hennar svo sem verða vill með þá sem komnir eru á efri ár en með góðri heilsugæslu var henni unnt að halda áfram sínu daglega lífi þar til yfir lauk.  Það var svo að morgni sunnudagsins 20. mars síðastliðinn að menn urðu varir við að verulega var af henni dregið og lést hún skömmu síðar, sinnandi skyldu sinni fram í andlátið.  Ekki er vitað nákvæmlega hvernig dauða hennar bar að garði en grunurinn beinist að ákveðnu vökvatapi sem mun hafa átt sér stað þá um nóttina.  En blessuð sé minning Deutz Lightmotor og er nánustu ættingjum hér með vottuð samúð.  Ákveðið hefur verið að við starfi hennar taki Lister Generator  sem kemur frá Bretlandi, gagngert til að taka við hlutverki hennar.  Lister þessi er nákominn ættingi þess Lister sem gegndi störfum raforkustjóra í Setrinu á undan Lightmotor og í beinan kvenlegg  af henni komin.  Þar sem jafnan var vel látið af störfum hennar í Setrinu væntum við mikils af störfum þessa nákomna ættingja fyrrverandi raforkustjóra.  Er hún væntaleg á næstu vikum en í millitíðinni verður reynt að fá íhlaupastarfsmann til að sjá um að halda orkumálum Setursins gangandi.  Nánar verður tilkynnt um þá tilhögun þegar ljóst verður hvernig þau mál verða leyst. 
Fyrir hönd ættingja Deutz Ligtmotor.
Logi Már Einarsson.  Formaður skálanefndar.

Skálanefndin hélt fund í vikunni varðandi notkun á Setrinu. Notkunin hefur ekki verið mikil undanfarið og kostnaður mikill ef fáir koma í hvert skipti. Svo var rætt um að reyna að koma á bókunarkerfi fyrir skálann á heimasíðuna, þannig hafa allir yfirsýn hvenær skálinn er laus. Svo í lokin vorum við farnir að fjalla um jeppaviðgerðir.

Skálanefnd 

Skálanefndin fór í sína síðustu formlegu vinnuferð um liðna helgi. Fórum við þrír úr nefndinni á föstudeginum og var byrjað það kvöld á að skipta um púströr á ljósavélinni. Svo var gengið til náða. Daginn eftir var ráðist á að klára pallinn og bæta við rennum á húsið. Rétt eftir hádegismat komu Siggi Trukkur og maður að nafni Guðmundur með honum og þeir settir í að færa timbrið sem var við gáminn og að rífa í sundur vinnuborðið bak við hús. GSM opnunarkerfið var einnig sett í og er komið í gagnið aftur. Á sunnudeginum var svo ráðist á að taka til í kringum og inní gámnum og taka niður vatnstankinn og pallinn sem tankurinn var á bakvið hús. Er nú svæðið í kringum húsið hið snyrtilegasta. Viljum við í skálanefndinni þakka þeim Sigga og Guðmundi fyrir ómetanlega hjálp.

Jón Emil. Ritari Skálanefndar.

Farin verður vinnuferð Skálanefndar komandi helgi 15-17 okt. Allar auka hendur eru vel þegnar fyrir þau verkefni sem fyrirhuguð eru, þar má nefna, ganga frá pallinum, skifta um rennur á bílslaginu og skifta um púst á ljósavélinni og eitthvað fleira. Sameiginlegur matur verður á laugardagskvöldið. Við reiknum með að leggja af stað seinnipart föstudags og koma heim á sunnudagskvöld. 

Skálanefnd. 

P.S. Skráning verður sett á spjallþráðinn