Sælir félagar.  Um liðna helgi var farið í fyrstu vinnuferð skálanefndar Seturs.  Markmið þessarar fyrstu ferðar sumarsins var að ná að helluleggja gólf neyðarskýlisins.  Náðist það markmið með glans, þökk sé vöskum hópi skálanefndarmanna og ættingjum þeirra ásamt heimiliskettinum og málara nokkrum sem hann dró með sér og reyndist betri en enginn.  Aukinheldur var unnið í vatnskerfi og rafkerfi skálans og ýmislegt í þeim efnum fært til betri vegar.  Undirbúningur vegna vinnuferðarinnar um næstu helgi var einnig inntur af hendi og verður þá dagtankur kamínu settur upp á sinn stað og tengingar kláraðar endanlega.  Olíutankurinn sem hefur séð skálanum fyrir olíu verður því tekinn endanlega úr umferð og verða þá öll olíumál skálans komin á einn stað og vonandi í endanlegt horf. Á planinu er einnig að huga að brunastigum.  Sökkulveggir neyðarskýlisins verða slípaðir og gerðir klárir fyrir veggjauppsetningu.  Önnur tilfallandi verkefni eru háð þáttöku félagsmanna. 

Þökkum að lokum þeim er létu verk af hendi rakna í síðustu vinnuferð.

F.h. skálanefndar. Logi Már.

Skálanefndin náði þeim markmiðum sem hún setti sér fyrir þessa vinnuhelgi, þ.e. að klára olíutengingu frá nýja aðaltanknum inn á dagtank ljósavélar og tengja botnrofa í dagtanknum sem drepur á vélinni ef dísilolíu þrýtur, þ.e. áður en tankurinn klárast alveg.  Aðalbreytingin fyrir þá sem gista og þurfa að fylla á dagtankinn í lok gistingar er á nú þarf aðeins að þrýsta á hnapp til að fylla á dagtankinn og sér þá rafmagnsdæla um að koma olíunni á tankinn.  Þetta tekur mjög skamma stund því að dælan er mjög öflug.  Guðmundur skálanefndarmaðúr orðaði þetta reyndar mjög snyrtilega og sagði að „þetta væri eins og að reka niður títuprón með sleggju“.  Hin breytingin sem um ræðir er að nú hefur verið tengdur rofi í dagtank sem drepur á vélinni þegar hún er u.þ.b. að verða olíulaus.  Þarf þá að dæla olíu á tankinn og endurræsa tölvu vélarinnar með því að slökkva á henni og kveikja aftur eftir stutta stund, þá ræsir tölvan sig aftur og hægt er að gangsetja vélina.  Væntanlega verður gerð nánari grein fyrir þessum breytingum á næsta félagsfundi.
Annars er það að frétta af þessari ferð að eftir að hópurinn sem var á leið í skálann komst við illan leik í skála um hálf tólf á laugardagskvöldið.  Fólk var fegið að komast í hús og tóku menn til matar og drykkjar.  Með í för var ný drifloka í Mussoinn og var hún sett í hann morguninn eftir í brjáluðu veðri, roki og skafrenningi en hafðist allt.  Allur hópurinn lagði svo af stað í bæinn um hálf eitt á sunnudeginum í þónokkrum vindi og skafrenningi og var skyggni ekki gott og færi þungt á köflum í byrjun.  Var ákveðið athuga með hvort vaðið á Þjórsá við Sóleyjrahöfða væri fært og var ákveðið að fara veglínuna niður að vaði þar sem snjóalög eru ekki enn nógu mikil á svæðinu til að fara stystu leið.  En þegar komið var um tvo til þrjá kílómetra frá Setrinu ókum við hins vegar út úr veðrinu og inn í sól og lágarenning, harðfennt færi og tóma hamingju.  Ferðin niður að vaði var því fljótfarin og var þá tekinn fram álkarl og athugað með þykktina á ísnum.  Eftir þá athugun var áin talin fær og brakaði ekki í ísnum undan þyngstu bílum þegar þeir óku yfir.  Ferðin niður í Hrauneyjar gekk svo tíðindalaust, ekið var í rjómaveðri og fallegu útsýni til fjalla.
Skálanefnd vill þakka Samúel Úlfr og Sólmundi fyrir framlag þeirra til rafmagnsmála í þessari framkvæmd og Gisla „Seinagengismanni“ fyrir að redda drifloku í Mussoinn og að vera afburða „húskarl“.   Ferðafélögum öðrum þökkum við samfylgdina, sjáumst síðar á fjöllum.

Logi Már.  Skálanefnd.

Um liðna helgi fór skálanefnd í fyrri af tveimur almennum vinnuferðum þessa sumars.  Þátttaka var ekki mikil en þeir sem mættu uppeftir létu sitt svo sannarlega ekki eftir liggja og gekk því vinna helgarinnar framar vonum.  Svo löng saga sé gerð stutt þá náðist að grafa fyrir fyrirhugaðri skemmubyggingu en það var reyndar ekki létt verk þar sem jarðvegurinn er mjög laus í sér og hrundi því mikið úr bökkunum jafnóðum og þurfti að margmoka uppúr skurðinum.  En þetta hafðist á endanum og voru sökkulfætur steyptir upp á laugardeginum ásamt því að binda járnagrindur í súlurnar sem koma upp af sökkulfótunum og einnig í eitthvað af veggjunum sem koma ofan á súlurnar.  Veggjamót voru einnig forsmíðuð.  Eftir að sökkulfætur höfðu verið steyptir var grill að hætti skálanefndar og kláraðist ekki borðhald kvöldsins fyrr en um tíuleytið en þá fóru menn út, stilltu af súlur ofan á sökkulfæturna og fylltu upp í grunninn aftur og lauk því um  hálf eitt um nóttina.  Á sunnudeginum voru súlurnar svo skornar í rétta hæð og steypt í þær og gengið frá grunninum til bráðabirgða.  Skurður var einnig grafinn fyrir nýjum rafmagnsheimtaugum og olíuleiðslu og því komið fyrir og fyllt í skurðinn og gengið frá þannig að þegar gámurinn verður færður verða allar rafmagns og olíuleiðslur komar á sinn stað og tilbúnar til tengingar.  Í næstu almennu vinnuferð, helgina eftir verslunarmannahelgi er svo meiningin að stilla upp mótum fyrir sökkulveggina, járnabinda og klára steypuvinnu.  Í september er svo stefnt að því að færa gáminn inn í sökklana en það getur reyndar oltið á því hvort olíutankamál leysast en þau eru í vinnslu í samráði við Skeljung þessa dagana.  Við í skálanefnd viljum svo að lokum þakka þeim sem ljáðu okkur lið þessa helgina en það voru Árni og Hlynur Ómarssynir, Heiðberg, Tóti litlunefndarmaður, Steini „Lada“ sem sá um að stjórna gröfunni af mikilli röggsemi og svo Þórður Adolfsson og Sigrún kona hans, allt saman miklir dugnaðarforkar.

Með góðri kveðju. 

Logi Már.  Skálanefnd.

Hluti skálanefndar er staddur í Setrinu þessa helgina og fórum við í könnunarleiðangur inn á Illahraun í dag. Mikinn snjó hefur tekið upp af leiðinni inn í Kerlingarfjöll og má nú segja að þokkalega sé fært á milli Seturs og Kerlingafjalla. Þó eru nokkrir skaflar á leiðinni sem ekki eru færir litlum bílum og er það því ósk okkar að ekki sé farið á óbreyttum bílum þessa leið, enn sem komið er, þar sem þeir komast ekki yfir skaflana. Mikilvægt er að ekki sé ekið með fram þeim og ný för búin til. Annars er það að frétta að skálavörður verður í Setrinu þessa vikuna eða fram á föstudag og við skálanefndarmenn verðum svo á staðnum um næstu helgi.

Til þeirra er málið varðar.  Það hefur viljað brenna við í vetur, þegar menn hafa yfirgefið skálann eftir gistingu, hafi þeir ekki gengið frá sem skildi.  Dæmi eru um opna glugga, ólæstan gáminn og þess háttar yfirsjónir sem geta valdið okkur miklu tjóni ef allt fer á versta veg.  Við viljum því hvetja þá sem eru í gistingu til að yfirfara allt vel áður en þeir fara með sérstaka áherslu á að allar dyr séu læstar, gluggar séu lokaðir og að verkfæri skálans, svo sem hamrar, rörtangir og þess háttar sem hafa verið notuð af einhverjum ástæðum á meðan dvöl stendur séu sett á sama stað og þau eru tekin en ekki skilin eftir í opnu anddyrinu.  Mjög gott er að taka einn hring kringum húsið og gáminn áður en lagt er af stað frá skálanum og líta eftir hvort nokkuð hefur gleymst.  Matarleifar og hálfbrunnin kol hafa einnig verið skilin eftir við skálann og er hvimleitt að koma að skálanum þegar þvílíkt er það fyrsta sem heilsar manni við komuna. Þvi viljum við í skálanefndinni hvetja alla til að ganga vel frá eftir sig að lokinni dvöl og ganga frá skálanum eins og við viljum sjálf koma að honum.  Annars er það af frétta af skálanefnd að við fórum uppeftir nýliðna helgi og yfirfórum skálann og byrjuðum að gera okkur grein fyrir framkvæmdum sumarsins.  Allnokkur snjór er ennþá á svæðinu og komumst við að því eftir könnunarleiðangur inn á Illahraun og Kisubotna að ekki sé ráðlegt að aka þessar leiðir ennþá vegna bráðnunar og bleytu.  Hætt er við að djúp hjólför myndist vegna bleytu sem enn er í aksturleiðunum.  Við förum aftur uppeftir um næstu helgi og förum þá Gljúfurleitarleiðina sem fyrr og munum þá skoða leiðarnar frekar og láta heyra frá okkur eftir það.  Nóg að sinni.

M.kv.  Logi Már.  Skálanefnd.

Svo sem kunnugt er þá stefnir skálanefnd að byggingu skemmu sem hýsa á rafstöð og nýjan olíutank Setursins ásamt því að vera viðgerðaraðstaða og geymslupláss,  í sumar.  Á fyrsta fundi skálanefndar sem haldinn var fyrir skömmu var sett upp plan þar sem stefnt verður að því að vera með tvær almennar skálanefndarferðir í sumar.   Verða þær dagana 27-29 júlí og 10-12 ágúst þ.e. helgarnar fyrir og eftir verslunarmannahelgi.  Fyrri helgina er stefnt að því að grafa fyrir undirstöðum og klára mótasmíði sem mest má vera og seinni helgina að klára það sem eftir verður af mótavinnu og steypa undirstöðurnar.  Gott væri ef gröfu og vörubílaréttindamenn væru til taks þessar helgar, sérstaklega fyrri helgina.  Við skálanefndarmenn reiknum svo með að verða á ferðinni flestar helgar í sumar frá og með mánaðamótunum júní/júlí og ef einhverjir hafa áhuga á að slást í för með okkur skálanefndarmönnum utan þessara almennu vinnuferðahelga  þá er það velkomið og hægt að leyta upplýsinga um slíkt hjá okkur.  Í haust er (september) er svo planið að koma gámi og olíutank fyrir inni í sökklunum, tengja nýjar raf og olíulagnir inn í skálann og ganga frá öllu fyrir veturinn.  Skemman sjálf verður svo smíðuð í bænum í vetur og flutt uppeftir í einingum næsta sumar og reist og gengið endanlega frá henni á 25 ára afmælisárinu, 2013.  Með von um góðar undirtektir. 

Skálanefnd.