Forum Replies Created
-
Replies
-
Mikið væri gott að fá einhvern ábyrgan aðila til að setja hér inn staðreyndir málsins – hverjir eigi að fá ókeypis uppfærslu o.s.frv.
Einnig er áhugavert að vita hversu stórt minniskort þarf að eiga til að koma nýju útgáfunni af öllu Íslandi inn.
Ágúst
Þetta er greinilega mjög flókið og erfitt mál.
Ef stöðin bilar aldrei – þá skiptir engu máli þó að sé frábær viðgerðaþjónusta og ef þú velur fallegu stöðina – er þá engin viðgerðaþjónusta ? Er þetta eins konar svikamylla ?
Dóttir mín, sem býr í Róm og á þar bíl lenti fyrir skömmu í því óhappi að verða bensínlaus og eftir það varð gangur í vélinni kolómögulegur. Bíllinn fer alltaf í gang, en drepur á sér í hægagangi og missir kraft og/eða rykkir við inngjöf. Heldur skánar gangurinn þegar vélin hitnar, en í heildina minnir þetta helst á gamaldags bensínstíflu, ef óhreinindi hafa farið af stað þegar tankurinn tæmdist.
Vegna dapurrar reynslu hennar af ítölskum bílaverkstæðum hef ég nú verið beðinn um ráð og aðstoð þótt fjarlægðin tefji óneitanlega nokkuð fyrir. Verst er að ég er ekki kunnugur þessari bílgerð og veit ekki einu sinni hvort bensínsían sé í vélarrúminu eða við tankinn – ef hún er á annað borð í bílnum.
Bíllinn sem um ræðir er VW Transporter árgerð 1991 og er keyptur á Íslandi. Vélin er 2 lítra bensínvél með beinni innspítingu.
Mér datt í hug að athuga hvort einhver lesenda 4×4 væri kunnugur svona vandamáli og hefði einhverjar upplýsingar tiltækar sem gætu hjálpað, t.d. reynslusögur um það hvort einhverjir hlutir bensínkerfisins í þessari bílgerð væru sérlega viðkvæmir fyrir bensínleysi.
Einnig væru linkar á vefsíður með tækniefni fyrir þessa bílgerð vel þegnir, bæði tæknilýsingar og síður með spurningum og svörum sérfræðinga.Ágúst
Ég hef átt Pajero með 2,5 lítra vél í allmörg ár og dútlað talsvert við hana.
Það er 100% eðlilegt að smiti eitthvað olíusull úr sveifarhússönduninni og til að losna við mengun af því er það leitt í soggreinina framan við túrbínu og vélin látin "endurnýta" grumsið.
Ef þú aftengir slönguna sem liggur úr ventlalokinu inn á soggrein þá ertu búinn að útiloka að smurolía fari þessa leið inn á soggreinina. Ef allt er með felldu þá kemur lítið annað en útblástursloft plús smá olíu- og vatnssull út úr þessari slöngu.
Ef hann er hins vegar að blása einhvern helling út þarna með fullt af smurolíu í bland, þá myndi ég giska á að nýja heddpakkningin hafi gefið sig og opnast milli einhvers cylinders og sveifarhúss. Þá myndi ég þjöppumæla til að sannreyna tilgátuna.
Annar möguleiki og öllu sennilegri er að túrbínan sé komin að niðurlotum og farin að leka olíu. Það getur sagt manni e-ð um ástand hennar að þreifa öxulinn. Hliðarslag á að vera í algjöru lágmarki, en dálítið endaslag er eðlilegt. Aðvörun: ALDREI REYNA ÞETTA MEÐ BÍLINN Í GANGI.
Tilgáta sem einhver setti fram um að ventlapakkdósir væru svo hriplekar að fari þar niður verulegt magn olíu finnst mér ekki líkleg, og myndi alveg ýta henni til hliðar.Fyrir utan heddpakkningu og túrbínu, sem ég hef þurft að skipta um þá hefur þessi vél reynst mér ákaflega vel.
Ágúst
Þar sem ég hef fram að þessu komist þokkalega af án þess að eiga 54 mm topp, en annar hver maður virðist eiga hann til þá langar mig að vita hvað menn eru helst að skrúfa með svoleiðis grodda.
Ágúst, sem er dálítið forvitinn
Það er ánægjulegt að sjá þessar reglusmíð. Mér líst vel á þær, en þó er ein grein, sem mér finnst torskilin og óska eftir útskýringum á:
6. gr
Til fjarskiptakerfis Ferðaklúbbsins 4×4 teljast leyfi til notkunar á þeim tíðnum, rásum eða
hópum sem klúbburinn hefur fengið úthlutað í sínu nafni og allur sá fjarskiptabúnaður
sem er í eigu hans, þar með taldir endurvarpar.Kveðjur
Ágúst
Ég sé ekki að þetta snerti olíuskipti beinlínis hvort túrbínan sé farin eða ekki.
Olía á díselvélum verður bleksvört nánast um leið og sett hefur verið í gang. Það er vegna sótmyndunar sem er mun meiri en í bensínvélum. Smám saman mettar sótið allar olíur og margfróðir menn mæla með að skipta um olíu og olíusíu á 5000 km fresti og hef ég fylgt þeirri þumalputtareglu.
Ég hef ekki notað önnur olíubætiefni en Militec, sem ég hef reyndar ofurtrú á
Ef þú ert búinn að keyra yfir 5000 km á olíunni sting ég upp á að þú skiptir um hana ásamt síunni, en annars myndi ég láta það eiga sig.Sel ekkert af ráðunum dýrt og tek enga ábyrgð á að vélin þín þoli að vera keyrð túrbínulaus þótt þú setjir á hana nýjar olíur og bætiefni í bak og fyrir.
Ath. Ef túrbínublað og/eða svarf úr túrbínunni hefur borist inn í öndunarfæri bílsins, barka, kæli og soggrein, þá ættirðu að yfirfara og hreinsa það eftir bestu getu því það getur ekki verið hollt að fá slíkt drasl alla leið inn í strokkana, jafnvel þótt sé mjúkt ál.
Ágúst
Ef þú ert tilbúinn að afskrifa túrbínuna sem 100% ónýta þá er vafalaust hægt að nuddast eitthvað á bílnum, en hann verður alveg grútmáttlaus og hætt við ofhitnun á ventlum, heddi og pústgrein.
Fyrst þarftu samt að aftengja og blinda smurlögnina að túrbínunni og frátengja loftbarkann sem liggur að millikæli eða soggrein þannig að restin af túrbínusvarfinu fari ekki inn á vélina.
Ég lenti í því með gamla Pajeróinn minn að túrbínan gafst upp norður í Skagafirði. Af ýmsum ástæðum þótti mér skásti kosturinn að reyna að keyra hann heim til Rvk og það tókst með aðferð eins og ég hef lýst. Ég ætla ekki að lýsa því hve slappur bíllinn var og gjarn á að reykja (það merkir að díselolían nær ekki að brenna upp í strokkunum = hitamyndun o.s.frv.). Hann komst þó óskemmdur í bæinn, en túrbínan var öskuhaugamatur. Ég mun seint gleyma því hve ég vorkenndi manninum í næsta bíl á eftir mér í Hvalfjarðagöngunum þau fáu skipti sem ég sá í hann fyrir reyk.Ágúst
Ef ég hef tekið rétt eftir, þá hefur Póst- og Fjarskiptastofnun rukkað klúbbinn fyrir einkarétt til afnota af fjarskiptarásunum. Fyrst aðrir aðilar eru að stelast til að nota okkar rásir, væntanlega til að spara sér að greiða fyrir sínar eigin rásir, þá er það klárt tilefni til að kæra til P&F. Stjórn klúbbsins mætti gjarna ganga í að safna upplýsingum um þessi atvik svo að hægt verði að senda inn rökstudda kæru með ítarlegum upplýsingum.
Ágúst
Þetta var frábært hjá þeim.
Hafi þeir bestu þakkir fyrir.
Ágúst
Hefur nokkur ykkar rekist á breytingakitt fyrir eldri díselvélar til að breyta þeim í Common rail innspýtingu ?
Ágúst
Veit nokkur hvar maður fær QMI teflon Ultra Gloss bílabónið ? Þeir í N1 eiga einhverjar vörur frá QMI, en ekki umrætt bón, og afgreiðslumaður sem ég talaði við taldi litlar líkur á að það yrði pantað á næstunni.
Veit nokkur hvort það fæst á Íslandi eða hvort mikið mál sé þá að panta það ?
Ágúst
Diesel Power
Ég fór fyrir skömmu í bókabúð í leit að aðþreyingarefni og endaði með að kaupa júníheftið af Diesel Power. Þótt efnistök séu miðuð við bandarískar aðstæður var engu að síður sitthvað forvitnilegt þar að finna.
Eftir að hafa lesið ýmsar greinar og pælt í auglýsingum þar sem alls konar aukahlutir og endurbætur fyrir díselvélar voru kynntar fannst mér að það hlyti að vera gaman að sjá hversu langt mætti komast í aflaukningu með því að velja saman þær breytingar sem mestu var lofað. Ég tók efni auglýsinganna alveg hrátt og samkvæmt ítrustu bjartsýnissjónarmiðum án þess að pæla neitt í smáatriðunum.Eftir auglýsingunum að dæma eru það einkum sex hlutir í venjulegum díselbíl sem hægt er að endurbæta til aflaukningar.
Fyrsta breytingin felst í því að setja rafmagnskæliviftur í stað reimdrifnu kæliviftunnar. Samkvæmt auglýsingu á bls. 209 má þannig græða allt að 27 hestöfl.
Næsta breyting er fólgin í því að setja á bílinn pústkerfi sem eru auglýst á bls 14 og 193. Við það geta allt að 35 hestar komið út úr skápnum. Nettó 62.
Að sjálfsögðu þarf loft að geta flætt óhindrað inn á vélina til að hún skili sínu. Í því tilefni er á bls 73 auglýstur loftsíubúnaður sem getur aukið hestaflatöluna um heil 50 hross. Þá er samanlögð aflaukning komin upp í 112 hestöfl.
Næst á listanum er innspýtingarbúnaður. Þótt ekki sé hentugt að nota nitro innspýtingu við langkeyrslu þá getur búnaðurinn á bls 201 bætt 150 hrossum í húddið þegar mikið liggur við. Þar með er hrossaaukningin komin í 262.
Þá eru tvö áhrifaríkustu atriðin ótalin. Stýritölvur sem eru auglýstar á bls. 46 og 177 eiga að geta töfrað fram heila 350 viðbótarhesta og er aflaukningin þá komin í 612. Loks eru á bls. 202 auglýstir töfraspíssar sem bæta við einum 400 hestum þannig að aflaukningin er komin vel yfir þúsund hestöfl. Hafi vélin t.d. verið 200 hestöfl fyrir þá ætti hún að standa í 1200 hestöflum þegar allar breytingarnar eru komnar á hana.Fyrir utan auglýsingaskrumið og þröngan sjóndeildahring ritstjórans sem endurspeglast í því að tæpast er nokkur vél nefnd á nafn nema sé Cummins eða Duramax þá verð ég að segja að mér fannst býsna gaman að þessu blaði. Gef því fjórar stjórnur.
Ágúst (Wolf)
Sennilega er rétt að spara stóru orðin í garð lögregluþjónanna sem voru að reyna að stoppa brjálæðingana. Þeir voru ábyggilega ekki útbúnir til þeirra stórræða sem hefði þurft til. Á myndbandinu eru a.m.k. tvö tilvik þar sem lögreglumaður hefði auðveldlega getað keyrt fyrir bílinn í von um að stoppa hann, en staðan er þessi:
Hinn bíllinn er mun þyngri og hann er á drjúgri ferð. Ökumaður lögreglubílsins er sjálfur skjólmegin, en hvað með vinnufélagann í dauðasætinu? Á að taka sénsinn á að hann sleppi eða slasist ekki mikið ? Hinn bíllinn gæti hugsanlega haldið áfram akstrinum með skerta ökuhæfni – er hann þá ekki enn líklegri til að valda slysi? Er maður þá hugsanlega orðinn meðsekur?Því miður, málið er ekki einfalt. Kannske hefði sérsveit getað gripið inn og afstýrt slysi. Erfitt að segja.
Síðasta vonin er sú að dómstólar landsins sjái til þess að delar eins og þessi setjist ekki aftur í ökumannssæti á neinu farartæki sem kemst hraðar en rafmagnshjólastóll. Sama á við um þann sem ók vélhjóli um suðurnesin á tæplega 300 km hraða í kastljósþætti sjónvarpsins fyrir skömmu.
Ágúst
Hvernig skyldi vera með þann fræga veg, Kóngsveginn? Hann er sennilega dýrasta verkefni sem íslenska ríkið hefur nokkru sinni lagt í þegar miðað er við fjárlög landsins. Ætli hann sé enn skráður opinberlega sem ein af viðurkenndum löglegum akstursleiðum landsins – eða er búið að fjarlægja hann af listanum ?
Spyr sá sem ekki veit.Ágúst
Hefur einhver spáð í þessar ótrúlega ódýru VHF handstöðvar á Ebay? Sjá Ebay númerið 130092766428. Þær ættu að vera vel innan við 10þús kallinn hingað komnar með öllum gjöldum. Hugsanlega enn lægri ef fleiri stöðvar eru keyptar í einu.
Kannske er þetta 99% drasl, en fyrir þennan pening má vel eiga eina til vara.
Hefur nokkur prófað eða spáð í þetta ?Athugið að aðrir en þeir sem hafa radíóamatörleyfi ættu ekki að reyna að flytja þær inn því að samkvæmt þeim reglum sem ég tel gilda mun mönnum verða neitað um tollafgreiðslu nema geta framvísað gildu amatörskírteini.
Ágúst (TF3AU)
Prófaðu að skipta um háspennukefli og platínuþéttinn. Báðir þessir hlutir geta gert svona kúnstir.
Ágúst
Raftæki eins og þessi HID ljós hafa öll innbyggðan spennubreyti sem getur hæglega geislað út truflunum sem koma inn á útvarps- og fjarskiptatæki.
Fyrsta greining á vandanum gæti verið að kanna hvort þessar truflanir heyrist alltaf þegar kveikt er á útvarpinu, óháð styrk og bylgjulengd, jafnvel líka ef stillt er á CD spilarann. Ef svo er þá er 99% öruggt að truflanirnar eru að berast eftir 12 Volta leiðslunum og þá leiðina inn í útvarpstækið. Þá er helsta lausnin sú að setja síu (þétta) á leiðsluna sem matar 12 Volta straum í ljóseininguna – eða við 12 V inntakið í útvarpið – eða báða staðina. Ef truflunin er hins vegar háð bylgjulengdinni sem viðtækið er stillt á og hækkar og lækkar með styrkstillingu þá er næsta víst að truflunin berst inn á tækið með loftnetinu eftir að hafa geislað út frá straumbreytiseiningunni.
Það getur verið talsverður eltingaleikur að losna við svoleiðis truflun. Helst er að reyna skermun eða að breyta afstöðu á vírum og spenni (eins og framleiðandinn hefur stungið upp á), betri eða breyttar jarðtengingar og síun á 12 Volta kerfinu.
Ef langir vírar liggja milli spenniseiningarinnar og perunnar sjálfrar þá geta þeir virkað sem sendiloftnet o.s.frv.Ef ekki finnst auðveldlega lausn á vandanum þá gæti verið ráð að leita til útvarpsvirkja sem hafa reynslu í bíltækjaísetningum. Þetta er þeirra sérgrein.
Kv.
Ágúst
Mér sýndist honum ekki takast alveg að klippa neglurnar í leiðinni.
Það hlýtur að vera stutt í að vefþjónninn leggist alveg á bakið. Það tekur stundum allt upp í mínútu að fara milli spjallþráða og getur tæplega haft neitt með myndvinnslu – thumbnails – að gera nema allir hinir notendurnir séu í einhverju myndaglápi meðan ég er að leita að uppbyggilegu spjalli.
Ágúst
