Forum Replies Created
-
Replies
-
Ég fyllti tankinn í jeppanum í dag á Shellstöðinni við Hótel Sögu.
Fór inn í afgreiðslu og framvísaði nýja Shell/4X4 félagsskírteininu við afgreiðsluna. Í stað þess að fá bæði afslátt og viðbótarafslátt þá kom óbreytt dæluverð á kvittunina. Til allrar hamingju tók ég tímanlega eftir þessu. Afgreiðslumaður sem tók málið að sér hringdi í aðalstöðvarnar og fékk staðfest að eitthvað í kerfinu væri ekki að virka rétt.
Til að bjarga málinu fékk ég mismuninn greiddan í peningum.Vonandi er þetta bara einstakt tilfelli, en maður veit aldrei.
Ágúst
600 watt continous merkir að hann eigi að þola að drífa tæki sem tekur 600 vött samfellt.
Ennfremur merkir 1200 watt surge að hann eigi að geta skilað út 1200 vatta toppafli í mjög stutta stund — ca. eitt augnablik.
Ef þú ert að hugsa um nota orkufrek rafmagnstæki í bílnum skaltu hafa í huga að rafgeymirinn er fljótur að tæmast með svoleiðis notkun og venjulegir geymar þola illa að tæmast.
600 vött í 2 klst jafngildir a.m.k. 100 Amperstunda notkun á 12 Volta kerfi og geymar af algengum stærðum eru þá löngu orðnir tómir.
Meðan vélin er í gangi þá kemur svo hleðsla á móti frá alternatornum, en magn hennar er bæði háð stærð alternatorsins, snúningshraða vélarinnar og því hversu mikið önnur tæki taka til sín, ljós, blásarar o.þ.h.Ágúst
Ef ekki er ráðlegt að hafa fremri kassann í neinum gír öðrum en 4. gír þá sé ég ekki neinn tilgang með honum. Er ekki miklu einfaldara að sleppa honum bara alveg ??
Ágúst
Truflanir eins og þú lýsir eru vafalaust annað hvort kveikjuvandamál eða bensínkerfisvandamál.
Fyrst þú ert búinn að skipta um allt í kveikjunni nema háspennukeflið þá myndi ég veðja á það.
Það er þó nokkuð algengt að keflin séu OK köld, en hætti að virka þegar þau hitna og lagist svo aftur við að kólna.
Einhver var búinn að nefna að athuga hvort bensínlokið hleypi ekki örugglega lofti inn. Ef það sogast glás af lofti inn þegar þú opnar lokið eftir að bíllinn missir kraft þá er það merki um stíflaðan loftventil. Eins ef hann byrjar að missa kraft og þú nærð að stoppa og opna lokið þá ætti hann að hressast strax.
Er blöndungurinn nokkuð með glerglugga þar sem er hægt að sjá hvort sé eðlileg bensínhæð í flotholtshólfinu ?GL.
Ágúst
Ég veit um einn sem er kominn á 35 tommur.
Mig minnir að eigandinn hafi bara sett upphækkunarklossa undir boddýið alveg sáraeinfalt. Bremsurörin liggja þannig að þarf ekki neitt að lengja í þeim og að mig minnir engar aðrar leiðslur sem ekki mátti tosa til svo að þær slyppu án þess að vera lengdar.
Eitthvað var hann að pæla í að halda áfram í 38 tommur, en ég veit ekki hvort hann hefur gert eitthvað í því.Ágúst
Laumar virkilega enginn á teikningum eða krækju í þær ?
Ágúst
Á nokkur til teikningar að rafkerfinu í Galloper, árgerð 2000, ssk ?
Einnig væri gott að vita hvort dagsljósakerfið í þessum bílum sem komu frá Heklu sé original eða eitthvað heimasmíðað.Teikningarnar í tölvuskrá má senda til agustus@internet.is
Með þökkum
Ágúst
Skúffa ofan á sýnist mér vera besta lausnin – þ.e.a.s. ef pláss leyfir og hún rekst ekki í neitt við mestu fjöðrun. Hvort hún er einbeygð, tvíbeygð eða þríbeygð ætti ekki að skipta miklu máli varðandi styrkinn svo lengi sem hún er samhverf yfir öxulmiðjunni.
Svona offset flatjárn eins og miðtillagan sýnir er vond lausn því að kraftur frá lóðréttu höggi undir hjól myndi leiða til beygjuátaks á ská fram á við. Skárra væri þá ef lóðrétta flatjárnið væri haft ofan á miðju rörinu.Ágúst
Mikið er gott að sjá að ég er ekki sá eini sem er haldinn þessum sjúkdómi.
Samt er ég ekki viss um að það sé neitt betra að vera læknaður af honum. Hugsið ykkur t.d. þá stöðu að einhvern daginn kæmist maður í verkefnaþrot; búinn að bóna bílinn, verkfærin á sínum stað, allur þvottur þveginn og frágenginn o.s.frv. Ekkert eftir nema að taka vel á móti konunni. Svo þegar hún loksins birtist og maður gerir sig líklegan til að bjóða hana velkomna þá bandar hún hendinni og segir " Aftur og nýbúinn".Wolf
Getur nokkur frætt mig um það hvort enn séu fánlegar samkrækjanlegar stálplötur sem má nota til að gera akfærn veg yfir mold og drullu. Maður hefur séð einhverja erlenda jeppakarla hafa svona meðferðis hingað til Íslands.
Veit einhver hvað svona plötur nefnast á ensku svo að sé hægt að gúggla þær
Í gamla daga voru stór svæði á Reykjavíkurflugvelli þakin með svona plötum og mig minnir að þær hafi verið kallaðar Flugvallajárn.Uppl. óskast
Ágúst
Að setja skerm úr blýi utan um ljósin finnst mér ekki líklegt til árangurs. Blý er eitrað og ættu allir að forðast það. Kopar er miklu betri leiðari og sennilega líka álið (man það samt ekki alveg fyrir víst).
Ég myndi byrja á að setja skerm úr álpappír utan um ljósin og leiðslurnar að þeim og tengja skerminn vel í jörð (boddíið) og prófa hvort truflanirnar minnka. Svo eru talsverðar líkur á að truflunin berist með rafleiðslunum að ljósunum og geisli út frá þeim. Við því er helst að setja síur á leiðslurnar. Radíóverkstæði sem sérhæfa sig í bílarafmagni eiga vafalaust til slíkar síur og leiðbeina með ísetningu þeirra.Wolf
Ég bíð þess að einhver miðjufaranna lýsi því yfir að væntanlegur erfingi hans hafi verið getinn á miðjunni og því ótvírætt yngsti einstaklingur sem þangað hefur komið.
Wolf
Hvaða hátíðir er átt við ?
Bolludaginn ?
Kjötkveðjuhátíðina í RÍÓ ?
Búsáhaldabyltinguna ?Wolf
Á þeim bílum sem ég hef átt held ég að ég geti fullyrt að bremsudiskar hafi alltaf dugað a.m.k. 100 þús km. og sumir miklu lengur en það.
Vafalaust fer það eftir ýmsu, s.s. því hvernig bílnum er ekið, hvort hann sé sjálfskiptur, gerð klossanna sem maður notar og mörgu öðru.
Eitt hefur þó alltaf komið mér á óvart þegar ég hef loksins talið ástæðu til að skipta um þá – hversu lítið þeir hafa kostað. Samanborið við aðra bílavarahluti þá bjóst ég alltaf við miklu hærri verðum en reyndin varð. Þá er ég að tala um verð í Stillingu, N1 og þeim búðum, en ekki umboðunum.Ágúst
…sumir eru bara jafnari en aðrir.
Wolf
Ég set jafnaðarlega Militec á vélar í bílunum mínum og trúi eins og nýju neti að geri heilmikið gagn.
Subaru Legacy sem ég á er nú ekinn rúmlega 300.000 km. og ekkert lát merkjanlegt á vélinni. Verst að hann ryðgar ekkert minna þrátt fyrir Militecið.
Svo átti ég Lada Sport fyrir nokkrum árum og lenti í því að öxull í smurolíudælunni brotnaði í ca 2 km. fjarlægð að heiman. Ég var svo fúll yfir þessu að ég keyrði heim eins og ekkert hefði gerst, skipti um smurdæluna og setti svo í gang án þess að líta á neinar legur. Vélin reyndist vera í fínu lagi. Þakka það Militecinu.
Ég hef aldrei sett Militec á gírkassa eða drif og hef ekki hugmynd um hvort það gefur einhvern eldsneytissparnað.Ágúst
Ég rakst á vef þar sem er sagt frá afrekum uppfinningamannsins George Constantinesco, sem ég hafði aldrei heyrt nefndan fyrr.
Meðal annarra uppfinninga er 100% mekanísk sjálfskipting, sem mér finnst býsna snjöll þótt bílaframleiðendur hafi valið aðrar lausnir.
Sjálfskiptingunni er lýst á þessari síðu: linkur en með því að fara á yfirsíðu og hliðarsíður má lesa helstu atriði úr lífi þessa lítt þekkta snillings. Góð lesning fyrir þá sem eru komnir með klígju af pólitísku fréttunum.Kv.
Ágúst
Gott að enginn hefur lent í því að brjóta heilann uppi í óbyggðum.
Wolf
Þar sem menn stinga upp á að þú notir tölvuaflgjafa þá vil ég ekki ráðleggja svoleiðis dæmi.
1. Til að hlaða inn á geymi. þá þarf spennan að fara upp í ca 14 Volt Tölvuaflgjafar gefa aðeins 12 Volt og eru flestir með innbyggða spennustilla og yfirspennuvörn til að hindra að úgangsspennan fari nokkurn tíma að ráði yfir 12 volt.
2. Það er beinlínis hættulegt að opna kassann á tölvuaflgjöfum og fikta í rásunum, bæði vegna hættu á að fá í sig 220 volta spennuna ef þeir eru í gangi og einnig eru þar spennuhlaðnir þéttar sem hafa allt að 320 Volta spennu. Venjulegast tæmast þeir sjálfkrafa á nokkrum mínútum, en ef afhleðsluviðnámin bila þá helst 320 Volta spennan á þeim dögum og vikum saman – þótt búið sé að taka draslið úr sambandi.
3. Virkni tölvustraumgjafa er miðuð við straumnotkun tölvubúnaðar og tiltölulega jafnt álag. Ef álagið fellur alveg eða skyndilega kemur inn mikið álag eins og t.d. af strartara þá gerist annað hvort það að straumgjafinn skynjar ástandið og slekkur á sér eða hann brennur yfir og það gerist á sekúndubroti með talsverðum látum.Ég er búinn að pæla talsvert í þessum tölvustraumgjöfum og niðurstaðan er sú að til almennra nota – annarra en við tölvur – eru þeir algjörir gallagripir.
Ágúst
Alþingi setti lög um þetta sem tóku gildi 1. október síðastliðinn, en eins og allt of algengt er þá var öll útfærsla skilin eftir og vísað til VÆNTANLEGRAR reglugerðar frá viðkomandi ráðuneyti.
Ég get ekki séð að endanleg útgáfa reglugerðarinnar sé komin í Stjórnartíðindi þótt komið sé fram á kvöld næst síðasta dags ársins og aðeins rúmur sólarhringur þangað til að eigi að fara að sekta samkvæmt henni.Það er að sjálfsögðu gjörsamlega óþolandi ef óskoðaðir bílar fá að vera í umferð og ég hef ekkert á móti því að trassarnir séu beittir hörku til að knýja þá til að mæta í skoðun, en það getur ekki verið samkvæmt almennum jafnræðisreglum ef byrjað er að refsa þeim sem minnst hafa trassað (bílnúmerin sem enda á 0), en hinum, sem meira hafa trassað gefinn aukafrestur. Að auki eru þær útfærslur sem ég held að séu til umræðu alls ekki fallnar til að hvetja trassana til að bæta ráð sitt og mæta í skoðun, heldur þvert á móti.
Það sem mér fyndist skynsamlegast í málinu væri þetta:
Um hver mánaðamót myndi vera tölvukeyrður listi yfir alla óskoðaða bíla sem eru komnir fram yfir eðlilegan frest. Samkvæmt honum verði síðan gefnar út sektir og þær settar í hefðbundið innheimtuferli. Sami leikur verði síðan endurtekinn um næstu mánaðamót o.s.frv. Skussarnir sem draga mánuðum saman að mæta í skoðun fá þá nýja sekt í hverjum mánuði og þegar elsta ógreidda sektin verður orðinn hæfilega gömul fer málið til lögfræðinganna og endar með uppboði á bílnum.Með þessu er engum mismunað, allir sem eru á óskoðuðum bílum í janúar fá þá sekt óháð því hvaða tölustaf eða bókstaf bílnúmer þeirra endar á og síðan aftur í febrúar ef þeir halda áfram að skussast við.
Því miður held ég að í sameiningu hafi Alþingis- og ráðuneytismenn sett saman eitthvað bölvað lagaklúður sem gerir engum gagn nema Sýslumanninum í Bolungarvík, sem á víst að sjá um framkvæmd á herlegheitunum.
Gleðilegt ár.
Ágúst
