Forum Replies Created
-
Replies
-
Vopni, eru þetta einhverjir hérna nálægt okkur sem eru með svona staðsettar dælur? Ég á nefnilega Fini dælu, eins og þú kannski veist, en hef verið með hana lausa. Ég væri svolítið hræddur við að hafa þetta innan í afturbretti á allflestum tegundum, en þetta fer auðvitað eftir plássi. Allavega hef ég ekki fundið pláss í þessum hvíta sem frúin er á!
Það víst orðið ansi mikið misjafnt hvort nýir bílar eru ryðvarðir með "íslensku aðferðinni" eða ekki. Ég verð nú að segja það eftir að hafa skoðað bíl að neðanverðu uppi á lyftu eftir árs akstur á íslenska þjóðvegakerfinu að mér sýnist nokkuð ljóst að grjótkastið, sem óhjákvæmilega fylgir bæði venjulegum þjóðvegaakstri, þótt það heiti klæðing, ellegar malarvegum, að þessi svarta leðja, sem við höfum sérhæft okkur í hér á landi, komi að verulegu gagni við að verja undirvagninn fyrir steinkasti. Það fer hinsvegar án efa mjög mikið eftir verkgæðum við ryðvörnina hvernig hún gagnast til að hamla á móti áhrifum saltpækilsins, sem menn aka um í mannabyggðum hér á landi mestan hluta vetrarins.
Það er líklega með þetta eins og jaðarskattana, það eru alltaf einhverjir sem lenda illa í því ef þeir eru nálægt mörkunum á einhverju. Það verður auðvitað að segjast eins og er, að lang líklegast er að ákvæði lögreglusamþykktanna séu ætluð til að koma í veg fyrir að stór atvinnutæki séu að valda slysahættu inni í þröngum íbúðagötum með því að taka upp það mikið pláss að þau þrengi að annarri umferð og takmarki útsýni. Hinsvegar má segja sem svo að 3.500 kg er kannski of lágt í sjálfu sér og 2.500 kg er afskaplega þröngt að manni finnst. Fullorðinn alvörujeppi, t.d. LC 80 eða 100, Patrol eða eitthvað álíka, er kominn í þessi mörk bara við að fara á 38" dekk og aukið tankarými. Það er líka ansi hart ef menn mega ekki leggja sínum ökutækjum í innkeyrslur heima hjá sér, þá er nú farið að vera ansi mikill ráðstjórnarbragur á viðkomandi sveitarfélagi.
Skv.heimasíðu dómsmálaráðuneytis sem Einar vísaði á í sínum pistli, þá virðist nú vera ansi mörg sveitarfélög sem hafa ekki skráða lögreglusamþykkt hjá stjórnarráðinu. En í framhaldi af því sem einhver segir hér að ofan, þá eru lögreglusamþykktir það best ég veit ekki settar af lögreglustjórum, þótt þeim beri að framfylgja þeim, heldur af viðkomandi sveitarstjórnum, en þurfa að fá staðfestingu ráðuneytisins. Ég hef skilið það svo, að þær hafi sama gildi og reglugerðir, þ.e. séu nánari útfærsla (staðfærsla) á tilteknum lögum, í þessum tilviki bæði umferðarlögum og ýmsum öðrum, en mega ekki í neinu tilliti brjóta í bága við lög, þ.e. þær verða að hafa stoð í lögum, eins og lögspekingar kalla það. En það er eins og venjulega, maður er alltaf einhverju fróðari þegar umræður fara af stað hér á vef 4×4, það eru svo margir félagar vel að sér í hinum ýmsu sviðum daglegs lífs að maður græðir alltaf einhvern fróðleik á þátttökunni.
Já, það er víst enginn vafi á því. Það var ansi mikið um það síðastliðið sumar og í haust að það var verið að stöðva fólk á svona bílum út af þessu.
Annars eru svo margir af okkur með hinar ýmsu gerðir af meiraprófi að það ætti að sleppa til eða hvað?
Nú á ég hvorki heima á Akranesi né á stóran bíl, þannig að hagsmunaárekstrar eru ekki fyrir hendi hjá mér, hjólið mitt er væntanlega undir þyngdarmörkum. Hinu velti ég fyrir mér, hvort hliðstæð ákvæði séu í lögreglusamþykktum annarra sveitarfélaga, því sé svo, er víðar pottur brotinn en á Skaganum.
Pallbílar margir yfir þyngdarmörkum lögreglusamþykktar fyrir Akraneskaupstað
Nú stendur yfir átak vegna brota á 18 gr. lögreglusamþykktar fyrir Akraneskaupstað. Þar segir að óheimilt sé að leggja vinnuvélum og vörubifreiðum sem eru meira en 3,5 tonn að leyfðri heildarþyngd og hópbifreiðum sem eru meira en 5 tonn, á götum og einkalóðum í íbúðahverfum eða á almennum bifreiðastæðum bæjarins. Það vakti athygli lögreglumanna við þessa vinnu að stærri pallbílar falla undir þetta ákvæði. Til að mynda er leyfð heildarþyngd Ford F-350 sem mikið hefur verið flutt inn af rúm 5 tonn.Lögreglumenn settu áminningar á 17 vörubíla og vinnuvélar sem lagt hafði verið ólöglega vikuna 16. – 23. janúar. Var umráðamönnum þessara tækja bent á að færa þau á stæði sem þeim eru ætluð. Sinni umráðamenn ekki þessum áminningum má reikna með því að beitt verði sektum, eins og segir á Lögregluvefnum.
Að sögn lögreglunnar á Akranesi fengu eigendur fyrrnefndra pallbíla, þeirra sem eru yfir þyngdarmörkum, ekki áminningar en samkvæmt lögreglusamþykktinni mega þeir í raun ekki leggja slíkum bílum á einkalóðum þó svo þeir eigi lóðirnar.
(Af mbl.is)
Ég segi nú eins og Björninn, eru ekki einhverjir búnir að skoða þennan fjórhjóladrifna bíl sem Master er að flytja inn? Það er manni sagt að sé í raun Sprinter sem búið er að föndra eitthvað við þarna í útlandinu. En af því einhver minntist á Dana 44 undir Econoline, þegar ég átti Bronco, skipti ég út upphaflega framdrifinu fyrir Dana 44, þá var ég búinn að mölva originalinn. Það virtist heppilegt kram undir gamla Bronco, en nú hef ég ekkert vit á þessu náttúrulega, en óskaplega þykir mér ólíklegt að Dana 44 séu nógu öflugt fyrir 44" dekk undir alvöru bíl eins og Econoline. En mikið dj….. hefur mann alltaf langað í Econoline!
Ég segi nú eins og Klakinn, maður er orðinn leiður á því að fólk segi ekki einu sinni takk. Ég er nokkuð oft búinn að tjóna mína bíla við að draga aðra og hef náttúrulega orðið að sitja uppi með það sjálfur. En svo hefur komið fyrir – ekki hjá mér sjálfum reyndar, en hjá mönnum sem ég þekki og veit að segja satt – að eitthvað hefur borið út af og sá sem dráttinn þáði tjónast. Þá er sá sem dregur sóttur til ábyrgðar, stendur ekki á því. Til gamans: Einu sinni vorum við tveir félagar að vinna að kvöldlagi utan þéttbýlis og leiðinda skafrenningur. Það bankaði upp hjá okkur maður og sagðist hafa fest Löduna sína í skafli skammt frá og tilkynnti okkur að við ættum að draga hann upp. Minn bíll var í sjálfu sér tiltækur, og ég spurði manninn hvort hann væri með spotta. "Spotta? Nei, þú ÁTT að vera með spotta, þú ert á jeppa!" Manninum var alvara. Auðvitað var ég með spotta og dró karlinn. But anyway: Ég hef þann sið að stoppa ef fólk veifar mér, annars ekki. Tilkynni þeim ef ég kippi í að það sé ekki upp á mína ábyrgð ef eitthvað skemmist.
Er ekki langbest að fara bara alla leið og setja loftfjöðrun í bílinn? Ég segi bara svona, held það sé ekki svo mikið dýrara að það eigi að fæla frá.
Nú er íslenski fiskiskipaflotinn einn stærsti notendahópur NMT – símakerfisins í dag. Mig grunar að það muni því hafa mikil áhrif á hvaða kerfi verður tekið upp í staðinn fyrir NMT, hvaða stefnu sá hópur tekur í málinu. Nú veit ég ekki á hvaða skriði umræðan innan þessa hóps er og hvaða stefnu hún er að taka, ef hún er þá einhver enn sem komið er. Þetta ýtir við mér allavega að heyra í þeim hjá Landssambandi smábátaeigenda og spyrjast fyrir. Maður þarf að vita hvað þarf að kaupa í bátinn í staðinn fyrir símann! Nú, en hvað varðar Tetra-kerfið, þá hélt ég satt að segja að það hefði beðið algjört skipbrot. Það er greinilega "alive and kicking" af þessari umræðu hér að dæma. En það sem ég ætlaði fyrst og fremst að skjóta inn í þessa umræðu var fyrirspurn til þeirra sem allt vita, hvort samkeppnisreglur Evrópusambandsins leyfi að eitt kerfi og/eða einn rekstraraðili verði með svona þjónustu?
Hefur ekki Dana 60 verið að koma best út þarna í þessum bílum, þegar menn hafa farið í 44"? Þá held ég að Ljónin séu líklegust til að leysa málið.
Sérfræðingar í dekkjum og hreinisvörum, sem hafa ráðlagt mér. hafa eindregið ráðið mér frá að nota tjöruhreinsi, sem ætlaður er til að ná tjöru af máluðum flötum – þ.e. yfirbyggingu bílsins. Það er í þeim flestum einhverskonar bónefni, stundum s.n. sabilex en efnin eru reyndar fleiri og mismunandi eftir framleiðendum. Tjöruhreinsirinn gerir þessvegna meira ógagn en gagn á dekkjum, geriri þau jafnvel hálli ef eitthvað er.
Þessvegna er best annað tveggja að nota White Spirit hreint, eða þá sérstakt dekkjahreinsiefni.
Burtséð frá þessu held ég að það sé alveg nauðsynlegt að hreinsa tjöruna öðru hvoru, það bætir mikið hemlunarvirkni dekkjanna, sem og "traction".
kv. gþg
Það er til gamalt orðtæki sem segir að engin keðja sé sterkari en veikasti hlekkurinn. Það á við líka um tógið. Það slitnar yfirleitt þar sem það er veikast fyrir. Stundum hafa spottarnir marist einhversstaðar, t.d. við að þungir hlutir hafa legið ofan á tóginu í farangursgeymslu eða annarsstaðar í bílnum. Það er því góð regla að skoða tógin öðru hvoru. Nú, og svo borgar sig ekki að hafa tógin hnýtt að staðaldri, hnútarnir veikja tógin ótrúlega mikið. Splæstar lykkjur eru yfirleitt sterkari en hnútar, en það getur þýtt að maður þarf að hafa lás úr stáli til að tengja spotta við bíl. Þeir geta verið enn hættulegri en spottinn einn og sér ef eitthvað lætur undan. Teygjutógin hafa bæði kosti og galla, þau geta haft úrslitaáhrif á það hvort bíll næst upp úr festu, en þau valda líka miklu meiri skaða ef og þegar eitthvað lætur undan. En eins og sagt er hér að ofan er afskaplega góð regla, hvort sem verið er að draga með dráttartógi eða með spili, að henda einhverju ofan á vírinn/tógið meðan átakið er mest, svo sem eins og úlpu, kuldagalla, teppi, poka eða einhverju sambærilegu. Það má segja að það sé nógu slæmt ef slitinn spotti skemmir bíl, en lakast er ef hann lendir á fólki.
Þetta er nefnilega hárrétt sem Ólafur Eiríksson segir hér fyrir ofan. Það er náttúrulega út úr kú að 4×4 fari að taka afstöðu móti öllum virkjunum og öllum framkvæmdum á hálendinu fortakslaust. Hinsvegar þurfum við að skoða hvert mál fyrir sig og EF viðkomandi framkvæmd, hvort sem það er stíflugerð eða eitthvað annað, breytir verulega eða hindrar að við getum farið tilteknar leiðir og/eða aðgengi að þeim sé verulega heft, ÞÁ er sjálfsagt að mótmæla. Við eigum hinsvegar ekki að vera í einhverju skyrslettustríði og ofbeldisaðgerðum, né heldur að vera með einhverja kreddufestu. Þessvegna vil ég ekki taka þátt í könnunni hér á síðunni, mér finnst að við eigum ekki að stilla málum upp á þennan hátt. Margar virkjunarframkvæmdir hafa síður en svo haft neikvæð áhrif á jeppa- og ferðamennsku, t.d. hafa framkvæmdir á Þjórsár/Tungnaársvæðinu yfirleitt verið fremur til að gera leiðir greiðari en hitt.
Ég vil nú endilega byrja á að þakka Benedikt fyrir hvað hann er málefnalegur í sinni umræðu. En ég var að velta því fyrir mér, hvort við megum ekki gæta okkar svolítið á því að vera ekki of kaþólskir í að forðast allt sem ágreiningur er um í samfélaginu. Því eins og Skúli benti á, geta ýmis atriði, hvort sem það eru nú virkjanaframkvæmdir eða eitthvað annað, rekist á hagsmuni félagsins okkar, þ.e.a.s. hindrað okkur í að t.d. fara tilteknar leiðir eða því um líkt. Í slíkum tilvikum finnst mér að við ættum að geta gert athugasemdir við t.d. framkvæmdaaðila og áform þeirra, án þess að 4×4 væri í sjálfu sér að taka almenna afstöðu í öllum sambærilegum málum. Skilst þetta hjá mér?
Það er nú ekki gott að koma fyrir í þessum bílum stærri geymum en 120 amperstunda. Satt best að segja á það líka að vera kappnóg, þótt margt sé um aukahluti, nema menn ætli að nota mörg tæki án þess að bíllinn sé í gangi. Höfuðatriði er að rafali (alternator) vinni rétt og spennu- og hleðslustilli sömuleiðis. Ef þetta er ekki í lagi, þá getur það eyðilagt nýja geyma á stuttum tíma. Þessvegna mæla fagmenn yfirleitt með því að ekki sé skipt um geyma nema fara vel yfir rafmagnsframleiðslukerfið í leiðinni með tækjabúnaði, sem ræður við verkefnið og af einstaklingi sem kann þetta. Það er hinsvegar málið varðandi diesel-HiLux að rafalinn í honum er full lítill miðað við íslenskan dótastuðul. En vegna þess að vacuumdælan er sambyggð alternatornum, er fremur erfitt að fá aðra og stærri rafala.
Þeir eru náttúrulega jafn misjafnir og þeir eru margir. Fyrst og fremst getur það verið mismunandi hvernig þeir varpa ljósinu, þ.e. hvort þeir safni ljósinu í einn punkt eða dreifa því eitthvað og þá hvað mikið. Svo eru þeir sumir tveggja geisla, þ.e. gefa bæði háljós og lágljós, liturinn er mismunandi o.s.frv. Svo eru luktarhúsin afskaplega misjöfn að gæðum. Einnig eru perustæðin sjálf og rafmagnsverkið í þeim misjafnlega vönduð. Satt að segja hefur verðið oftastnær endurspeglað gæðin, þótt það sé að sjálfsögðu ekki algilt. Hella ljós eru t.d. yfirleitt nokkuð góð að flestu leyti. Benni var með Dick Cepek ljós fyrir allmörgum árum, sem hentuðu reyndar best sem toppljós, 210W, og voru ansi vinsæl sem slík, en tiltölulega dýr. Varðandi Xenon-ljós, þá hefur mér skilist að ef þetta eru alvöru Xenon, þá þurfi að vera til staðar 49 volta spenna? Haldið þið að það sé rétt?
kv.
Tek undir með félaga Snæland, þetta eru skemmtileg fræði. Þetta með Þórðarhyrnu, mig minnir að í bók Sigurðar Þórarinssonar, Vötnin stríð, sem kom líklega út 1973, (er ekki viss) árið áður en vegurinn um Skeiðarársand opnaðist, þar segi dr. Sigurður frá einum erlendum könnunarmanni, sem skírði fjallið Vatnajökull-Housie, en það festist sem betur fer ekki við það. Í þeirri bók, sem upphaflega var ætlað að vera fræðileg skýrsla til Vegagerðarinnar til að vera stoðgagn við framkvæmdirnar á sandinum, er gífurlega mikill fróðleikur saman kominn, enda hafði dr. Sigurður einstakt lag og hæfileika til að nýta sér sagnfræðilegar upplýsingar í vísindastarfi sínu. Já, og talandi áfram um örnefni og í beinu framhaldi af því sem Jón Snæland segir hér ofar, þá er að gleymast að Vatnsfellið við Öskju var upphaflega kennt við W.L. Watts, en þetta breyttist nú í munni manna og varð bara Vatnsfell, sem er auðvitað miklu betra! Nú, og Svíahnjúkarnir á Grímsfjalli, eystri og vestri, heita svo í virðingarskyni við sænsku ferðagarpana Ygberg og Wadell, sem fóru þangað einna fyrstir nútímamanna. Þeir gerðu sér grein fyrir því að Grímsvötn væru eldstöð og skírðu hana reyndar Svíagíg, en það var náttúrulega óþarfi, því þetta hétu og heita Grímsvötn frá landsnámstíð að talið er.
Sendu grindina til þeirra í Sandblástur & Málmhúðun á Akureyri og láttu sandblása og zinkhúða þetta. Sendu þeim allavega fyrirspurn og spurðu hvað það kostar.
