Forum Replies Created
-
Replies
-
Kærar þakkir fyrir slóðina. Þetta er aldeilis gullnáma fyrir dellufólk eins og undirritaðan.
kv.
Er einhver til í að setja inn slóðina á þessa ágætu síðu, af einhverjum ástæðum tekst mér ekki að gúgla hana.
Í Árbók F.Í. 1967 er frásögn af fyrstu bílferð, sem vitað er um að hafi verið farin norðan Hofsjökuls og heitir sá kafli "Eyfirðingavegur" en sú leið var þekkt til forna og lá upp úr innanverðum Eyjafjarðardal og áfram til vesturs og kom saman við aðrar leiðir á Kili.
Jæja, félagi – nú er rétt að taka fram að ég er ekki viss um hvaða Háöldur þú ert að tala um. En ef ég má vera svo framhleypinn að tala um Háöldur sem ég þykist þekkja smávegis, þá eru þær þessar sem eru suður af Laugafellinu, austan við Hnjúkskvíslina. Syðst í þeim eru volgir lækir, sem bræða af sér á vetrum og við Sigurþór fóstri minn í Messuholti mældum einu sinni í sama skiptið og merkt var fyrir slóðinni, sem þarna liggur frá vegamótum vestan við Fjórðungsvatn að Laugafelli. Þá mældum við þarna hæst hitastig +34°C eftir því sem mig minnir. Við vorum með talsvert nákvæman kvikasilfursmæli, sem var reyndar fenginn að láni hjá sæðingamönnum! Síðan eru hið minnsta 25 ár ef ekki meira. Get grafið það upp, held ég.
Nú ætla ég ekki að halda því fram að ég skilji hvað þetta snýst um, en minni á sjálfskiptinguna sem er original í t.d. Pajero – sumir framleiðendur kalla þetta tiptronic – skiptingar – ég ætla svo sem ekki að lýsa þessu nánar, þetta hafa flestir séð held ég.
Sá á mbl.is að sveitarstjórn Bláskógabyggðar hefur „tekið vel“ hugmyndum um byggingu 20 herb. hótels í Skálpanesi á vegum The Activity Group. Tekið er fram að svæðið sé innan þjóðlendu, eins og það heitir víst núna, og því sé umsóknarferlið flóknara og seinlegra. Nafngreindur er Óskar Bergsson, form. nefndar um Svæðisskipulag Miðhálendis, sem hafi tekið þessu vel skv. texta fréttarinnar. Nú er þetta svolítið á skjön við það sem ég hélt vera í gildi varðandi Svæðisskipulagið, en þar var ekki gert ráð fyrir slíkum miðstöðvum inn á sjálfu hálendinu, heldur við jaðra þess. En öllu er í sjálfu sér hægt að breyta. En það væri fróðlegt að fá álit 4×4 félaga á þessari nýbreytni. Ekki síst með tilliti til þess að upp á síðkastið hefur verið nær útilokað að fá leyfi fyrir því að reisa ný mannvirki inni á hinu skilgreinda Miðhálendi.
Nú er ekki úr vegi að bæta hér smávegis inn, eftir að sjálft Morgunblaðið (les einhver Moggann enn?) kom með þetta málefni í forystugrein. Reyndar lýsir Ztyrmir frati í hugmyndina. Hann um það, en eru háttvirtir félagar í 4×4 með einhverja skoðun á málinu?
Þetta lítur allavega vel út á blaði. Asskoti væri gaman að sjá þetta í praksis. Man ekki eftir því að hafa séð neinn búnað áður sem: a) læsir beggja vegna felgunnar og b) nýtist á venjulegar felgur án þess að þeim sé neitt breytt. Ein spurning sem vaknar er sú, að vegna þess að þetta virðist byggjast á því að locking búnaðurinn sé þaninn út með lofti, hvort það breyti einhverju varðandi burðarþol dekksins þegar búið er að hleypa verulega úr því og hvort það leggst eins og án svona búnaður. En þetta verður líklega bara að prófa til að fá svör við þessu. Trúlega virkar þetta fullt eins vel í stórum dekkjum, þ.e. 44" og upp úr. En það þarf nú ekki að vera rétt tilgáta.
Við gömlu hjónin erum búin að vera með Palomino Colt frá Seglagerðinni í eftirdragi frá því 1997, alltaf sama gripinn. Er í toppstandi enn. Reyndar þótti okkur hjólastellið ekki nógu traustvekjandi, svo við fengum þá feðgana í Parti á Eldshöfðanum til að setja undir það nýtt hjólastell, létum blaðfjaðrir nægja, en þetta er déskoti gott hjólastell með rafmagnsbremsum og virkar vel. Höfum dröslað þessu á eftir okkur hinar ýmsu fjallaleiðir og virðist þola nánast allt. Þetta er nú frekar lítið og létt fellihýsi, eitthvað innan við 600 kg með öllu og Pajeroarnir vissu lítið af þessu í drætti. Nú reynir hinsvegar á það hvort KIA Sorento ræður við þetta með sama hætti í sumar.
Ég vil taka undir með Jóni Snæland varðandi slaufur og mislæg gatnamót. Þegar fyrstu slík gatnamót voru gerð hérlendis, þ.e. gatnamót Reykjanesbrautar/Sæbrautar og Miklubrautar/Vesturlandsvegar í Elliðaárdal, tókst mjög vel til. Þessi gatnamót virka vel enn þann dag í dag og eru með svipuðu sniði og þeir þekkja, sem ferðast hafa erlendis. Það má segja, að þegar Höfðabakkabrúin var byggð, hafi menn lent í vandræðum því þar var rými fyrir samskonar gatnamót og þarna niðri í dalnum ekki nægilegt fyrir samskonar slaufur og því varða að finna aðrar lausnir. En svo komu næstu gatnamót, þ.e. þar sem Víkurvegur og Vesturandsvegur mætast og Breiðholtsbraut og Reykjanesbraut. Að maður tali nú ekki um hörmungina í Vatnsmýrinni. Þarna virðast blessaðir verk- og skipulagsfræðingarnir hafa farið á eitt herjans mikið flipp og manni sýnist að þarna hafi verið valdar þær aðferðir og leiðir, sem eru hvað flóknastar og óvinveittastar notendum. Þannig að í staðinn fyrir að greiða fyrir umferð, verða þessi gatnamót til þess að gera umferðina stirðari og hættulegri. Af hverju er ekki hægt að læra af t.d. Þjóðverjum í þessum efnum?
Það var verið að spjalla um íblöndun í dieselolíu á öðrum þræði og það var reyndar í tengslum við að menn voru þar að bollaleggja um hvort hægt væri að lækka eldsneytiskostnaðinn með því móti. Við vorum þar í því samhengi að velta fyrir okkur hvort vélar með tölvustýrðri samrásarinnsprautun þyldu steinolíublandað eldsneyti. Maður fær svolítið misvísandi upplýsingar um það atriði. En þessi svokallað vetrarolía fær yfirleitt aukið frostþol með íblöndun tiltekinna, kemiskra íblöndunarefna að því manni er sagt. Í þessu samhengi öllu væri fróðlegt ef einhverjir tækju sig til og öfluðu haldgóðra upplýsinga um þessi atriði, ef þarna er þá yfirleitt einhver vafi á ferð, sem flest okkar vitum ekki nógu vel um. Það að kondensvatn myndist í tönkum þar sem kalt er, mun vera nokkuð þekkt mál og þar til viðbótar kemur að nokkuð víða mun sú aðferð notuð þegar dælt er frá skipi í birgðatanka olíufélaganna, er sjó dælt á eftir síðustu dropunum, til að ekki sé olía í leiðslunum, heldur fari hún öll í tankana. Þetta þýðir í flestum tilvikum að sjór fer í meiri eða minni mæli upp í tankana og umsjónarmenn þeirra þurfa að vera mjög passasamir með að hleypa undan þeim þegar hæfilegur tími hefur liðið frá dælingu, þannig að sjórinn hafi tíma til að skilja sig frá olíunni og setjast til í botni tankanna, því hann er jú þyngri en olían. Áreiðanlega er misjafnt, hvernig að þessu er staðið og hversu samviskusamlega þetta er gert. Það fer því ekki hjá því að einhverju magni af sjó er dælt með olíunni á birgðatanka sölustaðanna og þegar við bætist svo kondensvatn, þarf að dæla reglulega undan tönkunum. Áreiðanlega er einhver misbrestur á því hversu oft og samviskusamlega þetta er gert á hinum einstöku stöðum. Allavega hafa t.d. þeir, sem reka vinnuvélar og flutningabíla þá reglu, að nota ísvara í eldsneytið yfir veturinn til að komast hjá gangtruflunum af völdum vatns.
Svona að öllu gamni slepptu, þá man ég eftir því að í leiðarvísi í gömlum Scania Vabis 56, ég held árg. 1955 eða eitthvað svoleiðis, sem ég kynntist á sínum tíma, var gert ráð fyrir því að þegar frostið færi niður fyrir -10° þá mætti blanda allt að 10% steinolíu í dieselolíuna, en þá yrði að setja sem svaraði 10% af steinolíunni af tvígengisolíu, vegna þeirrar minnkunar á smurhæfni, sem leiddi af tilkomu steinolíunnar, sem innihélt náttúrulega ekki paraffín í þeim mæli sem dieselolían hafði og var m.a. ætlað að smyrja olíuverk og spíssa. Síðan hefur auðvitað margt breyst. Farið er að hafa sérstaka vetrarútgáfu af diesel olíunni sem hættir minna til að þykkna við kulda. Mekanísku olíuverkin eru að hverfa af sjónarsviðinu og sumir þjónustuaðilar og leiðarvísar banna alveg að nota steinolíu, hvað þá bensín, saman við eldsneytið, því þessi elektronísku olíukerfi þoli það ekki, það raski öllum stillingum og skynjurum í þeim. Ekki ætla ég að ábyrgjast að þetta sé heilagur sannleikur, en ég þori allavega ekki annað en fara eftir þessu meðan bíllinn er í ábyrgð.
Mig langar til að þakka formanninum okkar fyrir skörulega og ágæta grein í Mogga í dag, þar sem hann svarar á mjög yfirvegaðan hátt ósanngjörnum og röngum fullyrðingum sem komu fram fyrir nokkrum dögum í forystugrein blaðsins. Orðlengi þetta ekki frekar en endurtek þakkir til Skúla fyrir góða grein.
Ég held það sé óþarfi að hnýta í Eirík þótt hann hafi vakið athygli okkar á þessum leiðara Moggans. Þótt lesendum Moggans fari hratt fækkandi, þá eru það ansi margir enn sem taka mark á skrifum Ztyrmis. Án efa er stærri hópur en okkur grunar sem hugsar eftir þeim farvegum, sem þarna koma í ljós. Það er því fyllsta ástæða fyrir okkur að taka eftir þessu og ef einhverjir fara að spinna þennan vef áfram, þurfum við að bregðast við. Jón "Ofsi" Snæland vinur okkar er t.d. vel ritfær og ég fyrir mína parta treysti honum vel til að svara fyrir okkur á máli sem fólk skilur. (Þegar hann kemur heim af stóra skaflinum!)
Vafalaust eru þeir fleiri, sem við höfum innan okkar raða sem gætu lagt þarna hönd á plóg. En svona leiðari sýnir okkur, að við verðum að halda vöku okkar ef við eigum að halda því frelsi til ferðalaga, sem þó er enn eftir.
Staðfestir það sem gamall vinur minn hefur lengi sagt; Það eru festurnar, sem gera ferðirnar eftirminnilegar. Maður man bara aldrei eftir hinum! Ég vildi að það hefðu verið til digital myndavélar í sumum ferðum mínum og minna kunningja hér á sjöunda, áttunda, níunda og tíunda áratug síðustu aldar. En, svona er lífið! N’u er maður eins og dauðu rónarnir sem drekka í gegn um þá sem lifa!
Annars kann maður ykkur öllum, sem hafa sett myndir á þennan þráð bestu þakkir. Nú dreymir mann festur í alla nótt!
Það er eiginlega að bera í bakkafullan lækinn að bæta við þetta, hér er eiginlega búið að segja allt sem skiptir máli varðandi þessa hluti. Eins og fram hefur komið, þá hefur allt sína kosti og sína galla. Ég vildi hinsvegar undirstrika, að ef þú ætlar að nota bílinn líka sem "daily commuter" eins og svo mörg okkar gera, þá mæli ég frekar með loftlæsingu skv. minni reynslu. No-spin læsingin er déskoti varasöm á hálku auk þess sem bíllinn getur verið afskaplega stirður, einkum þegar þarf að vera að snúa og skælast þar sem þröngt er á þurru malbiki. En þetta þessar amerísku læsingar eru alveg prýðilega smíðaðar, það er ekki vafi. ARB-loftlæsingin er mjög góð og þú ræður náttúrulega hvort og hvenær hún er á eða ekki. Hinsvegar eru reynsluboltarnir í bílabreytingum búnir að finna ýmis ráð til að ganga þannig frá þeim, að maður sé laus við ýmis vandamál sem þeim fylgja, svo sem því að hafa loftlagnirnar nægilega sterkar, auk þess að verja þær hnjaski og koma þeim fyrir þar sem þær eru ekki útsettar fyrir áverkum. Þess utan kunna þeir ýmis ráð til að forðast raka í loftkerfunum. Fáðu að kíkja á þetta hjá einhverjum þrautreyndum félaga, og helst fleirum en einum, í þínu nágrenni og sjáðu hvernig þetta hefur verið gert. Góðar kveðjur.
Nær allir framleiðendur véla með samrásarinnsprautun (common rail), gera beinlínis kröfu til þess að á þær séu notaðar synthetiskar fjölþykktarolíur. Manni er allavega sagt að það sé þrýstingur frá smurolíukerfinu sem opni fyrir olíuflæðið inn á innsprautukerfi vélarinnar, og hún megi ekki vera þeirrar gerðar sem þykknar í kulda ef vélin á yfirleitt að fara í gang. Nú eru til blandaðar olíur, sumsé bæði úr synthetiskri og jarðefnaolíu og þær eru nokkuð ódýrari. Þær má víst nota á stöku vélar, en í flestum tilvikum er víst brýnt að nota þær olíutýpur, sem framleiðendur krefjast meðan vélarnar eru í ábyrgð a.m.k. Þetta hefur allavega verið lesið yfir mínum hausamótum og ég hef ekki þorað annað en fara eftir þessu.
Ég þurfti að endurnýja dempara í síðasta Pajero sem ég átti og ég lét mig hafa það að kaupa original dempara, enda voru þeir búnir að klára sig vel, eða um 150.000 km akstur. Manni finnst talsvert gott að geta breytt stillingunni við ýmsar aðstæður, svo sem eftir gerð vegar, hleðslu á bílnum og svo í öðrum tilvikum, svo sem eins og í snörpum hliðarvindi undir Hafnarfjallinu! Þekki ekki hvort KONI passa í Pajeroinn eða hvernig verðhlutfallið er milli þeirra og original dempara.
Þvílíkt og annað eins. Ekki það, maður skilur vel þennan þjónustustjóra hjá Gæslunni að vilja ekki taka ábyrgð á þessu, það er eiginlega hrósvert hugrekki sem maðurinn sýnir. En þegar verið er að ráðstafa svona stórum hluta af skattgreiðslum almennings til 35 ára hið minnsta eins og menn skrifuðu undir með bros á vör hér í vikunni, þá fer maður að velta fyrir sér hvernig forgangsröðunin er hjá þessu liði. 35 x 700 milljónir plús vextir og plús fjárfestingarkostnaðurinn og plús vextir af honum, nei nú þori ég ekki að reikna. Nú þegja fjölmiðlarnir áreiðanlega, það má ekki styggja menningarelítuna.
Partur ehf., fjaðrabúð, Eldshöfða 10, sími 567 8757 Viðar.
Ég held að okkar ágæti formaður hafi hitt naglann á höfuðið í síðasta innleggi sínu. Sannleikurinn er nefnilega sá, að margir upphaflegu vetrarferðalanganna – líklega langflestir – komu úr einhverskonar umhverfi, sem hafði kennt þeim undirstöðuatriði í ferðamennsku og fjallamennsku. Áreiðanlega var stór hluti okkar með talsverða reynslu úr björgunarsveitunum svo dæmi sé tekið. Nú finnst mér hinsvegar – án þess ég sé með neitt eða neinn sérstaklega í huga – að sífellt fjölgi þeim sem hafa ekki annað tl brunns að bera en að hafa getuna til að kaupa farartæki með tilheyrandi búnaði. Slíkt getur haft hættu í för með sér, einkum og sér í lagi ef slíkt fólk nýtur þess ekki að ferðast með sér reyndara fólki í fyrstu skiptin. Auðvitað dugar reynslan ekki alltaf og slys verða þótt þrautreynt fólk eigi í hlut, um það vitna dæmin, því miður. En ég held við ættum hvert og eitt okkar að líta í eigin barm og skoða hvort einhverjar athugasemdir sem hér hafa komið fram eigi við okkur. Ekki rjúka upp og reiðast.
