Forum Replies Created
-
Replies
-
Sko, ég segi bara fyrir mig, ef ég væri orðinn ungur aftur og ætlaði að fá mér bíl í vetrarferðir, þá væri það ekki spurningin að fá sér Fx4 350 á a.m.k. 49" dekkjum, helst 53" sem eru það stærsta sem ég hef séð af nothæfum dekkjum í bílablöðum. Ef einhverjir hafa ráð og möguleika á að eignast svona trukka finnst mér það því bara gott mál og fagnaðarefni. Talandi um að fara niður um ís og basl í krapa, þá hefur það nú lengi fylgt. Flestir við þessir gömlu eigum í minningunum (hvort sem við viljum kannast við eða ekki!) ýmsa svona viðburði. Nefni engan slíkan atburð að sinni, þar koma ansi oft aðrir við sögu og því ekki rétt að gera það án þeirra leyfis.
við að lesa það sem Ofsi er að minnast á varðandi leiðirnar milli Laugafells og Sprengisandsleiðar. Af því ég var þátttakandi í því að setja niður leiðina sem Ofsi kallar "Forsetaleið", þá var ástæðan fyrir því að farið var þarna sú, að þetta sem hann kallar "Miðleið" lá hærra í landinu og varð seinna fær á vorin. Annars má segja um leiðina suður með Laugafellinu og Háöldunum, að hún liggur víðast mjög nálægt leið sem Guðmundur heitinn Jónasson notaði nokkrum sinnum á ferðum sínum, þar sem hann var víða frumherji í bílaferðum eins og flestir í okkar hópi vita. Ég á einhversstaðar til minnispunkta frá þeirri ferð, þegar sú leið sem nú er notuð var sett niður undir forystu Gísla Felixsonar, þáv. rekstrarstjóra hjá Vegagerðinni og Sigurþórs Hjörleifssonar, fv. ráðunauts í Messuholti. En í árbók Ferðafélags Íslands 1967 er frásögn Hallgríms heitins Jónassonar um ökuferð sem þeir kölluðu fyrstu bílferð um Eyfirðingaveg, en fylgdi þó Eyfirðingavegi ekki nema að litlu leyti, því úr því að austur fyrir Ásbjarnarvötn kom, munu þeir félagar hafa farið miklu sunnar skv. ferðalýsingunni, eða skammt frá "Strompleiðinni" sem Skagfirðingar kalla og Ofsi þekkir vel og vafalaust fleiri. En þetta vekur upp hjá manni þá hugmynd, hvort einhverjir sjái ástæðu til að safna saman frásögnum um hinar ýmsu fjallaleiðir og hvernig staðið var að því að gera þær að bílaleiðum. Víða var reyndar fylgt fornum reiðleiðum, en þó var það langt frá því algilt og margar leiðir urðu vafalaust til án þess að hafa verið algengar sem reiðleiðir á öldum áður. Nóg bullað í bili. Kv. Ólsarinn á Króknum.
http://esv.blog.is/blog/esv/entry/96636/
Einar Sveinbjörnsson, veðurfræðingur úr Garðabæ, bloggar um veður og nýjasta bloggið hans er veðurfarsspá fyrir janúar- marz 2007. Ef ég skil þetta rétt, þá gera spárnar sem hann er að vitna í ráð fyrir kaldara veðri en í meðallagi.
Verst að mannfjandinn er framsóknarmaður og því líklega ekkert að marka hvað hann segir!
Hafðu heill mælt. Engu við þetta að bæta.
Farið svo varlega um áramótin félagar góðir og megi nýja árið verða gjöfult á góð og slysalaus ferðatækifæri.
Tek undir þinn pistil í einu og öllu. Var sjálfur þátttakandi í björgunarsveitarstarfi í á þriðja áratug og get staðfest og tekið undir þetta sem Klakinn skrifar. Nokkuð öruggt að maður ergir sig ekki á að horfa á Spaugstofuna í framtíðinni!
Tíminn er nú fljótur að líða og bílar verða gamlir. Svo er nú líka það, að þegar þetta er á annað borð komið inn í reglugerðir, þá er tilhneigingin hjá reglugerða- og bannpáfum hins opinbera að túlka Brussell – reglurnar þröngt. Nú er ég ekki að mæla með því að menn séu að setja bugspjót eða múrbrjóta framan á bíla sína, fjarri því, en umræðan fer nú oft um víðan völl og villustigu og ekki síst þegar fjölmiðlarnir fá "blod paa tanden", sbr. þegar breyttir jeppar lenda í árekstri þá fer ævinlega af stað umræða um hvað þetta séu hættulegir bílar í umferðinni. Jæja, mér má víst vera sama, kominn á minn aldur! Engin hætta á því að ég eignist nokkurntíma draumabílinn, Ford F350 Fx4 á 53" dekkjum!
Takið eftir að það eru löggurnar á Selfossi og Blönduósi sem hafa fengið svona sjónauka skv. fréttunum. Gaman þætti mér að vita hvað þeir hyggist skoða í umferðinni sem þeir sjá ekki sjónaukalaust? Kannski bara hvaða konur séu með hvaða körlum og svo framvegis?
Þeir voru að segja mér nokkrir félagar mínir úr deildinni hérna í Skagafirði, að núna um áramótin tækju gildi breytingar á reglugerð um gerð og búnað ökutækja, þar sem m.a. væru mun strangari ákvæði um t.d. aukaljós, kastaragrindur, spilfestingar og því um líkt sem komi framan á bíla. Þetta hafði allavega farið framhjá mér, sem segir nú ekki neitt í sjálfu sér, en mér þótti undarlegt að hafa ekki rekist á neinn þráð um þetta hér á síðunni. Kannski hef ég bara tekið svona illa eftir? Allavega þætti manni gaman að sjá og lesa eitthvað frá tækninefndinni okkar góðu um þessa reglugerðarbreytingu og hvernig þeim líst á.
kv.
Kallmerki er nokkuð sem mín kynslóð þekkti vel meðan "Gufuness" stöðvarnar voru málið. Einnig verðum við sjóhundar að nota kallmerki bátsins ef og þegar við notum okkar stöðvar. Nú hef ég ekki enn orðið svo frægur að eignast VHF-stöð í bíl og geri það vafalaust ekki úr þessu. Hættur að jeppast eftir nær hálfrar aldar skak á hinum ýmsu tegundum um vegi og vegleysur. En mér líst vel á þessa hugmynd um kallmerki og límmiða, sem stungið hefur verið upp á og mæli með því að fjarskiptanefnd skoði hana í fullri alvöru. En með þessar blessaðar opinberu stofnanir, já, það er hægt að halda langar ræður um hugarfarið sem þar ríður húsum. Sleppi því hinsvegar hér, enda varðar það við lög að lýsa skoðunum sínum á opinberum stofnunum og starfsmönnum þeirra.
Var að skoða þetta Soffíumyndskeið á mbl.is – Víst er þetta umhugsunarvert, en auðvitað er endurbygging svona tækja gríðarlega fjárfrekt fyrirtæki. En þetta leiðir hugann að öðrum fjalladrottningum, sem jafnvel eru enn í notkun og því sem næst fullu fjöri. Einhverntíma var til á Dalvík Studebaker-Reo sem var mikið í fjallaferðum og svo á nú félagi Olgeir geimskipið sitt, sem er ef mig misminnir ekki M-37 árgerð 1953, eða hvað, Olgeir? Er það ekki líka með svona "sjúkrabílsyfirbyggingu" eða hvað þetta var kallað, sem er að verulegu leyti original? Það væri vissulega vel þess virði og áhugavert skoðunarefni, hvort ekki væri hægt að leggja því lið að svona tæki fengju nauðsynlega aðhlynningu án þess að sálum þeirra væri misboðið. Það er varla á nokkurs eins manns færi nema auðkýfinga að standa í slíku og e.t.v. geta klúbbfélagar lagt lið á þeim vettvangi? Þessir gömlu trukkar hafa sinn sjarma og í augum þeirrar kynslóðar sem við Olgeir tilheyrum, voru þetta "alvöru – bílar" eftirstríðsáranna og með hreinum ólíkindum hvað þeir þoldu að vera misboðið dag út og dag inn. – Völundurinn Björn Sverrisson hér á Sauðárkróki er nýbúinn að endurbyggja Chevrolet hertrukk árgerð 1942 þannig að hann lítur út eins og nýr og tilbúinn til hernaðarátaka! Það er aldeilis óskaplega gaman þegar svo vel tekst til, en þetta kostar ómældan tíma, þolinmæði og síðast en ekki síst peninga.
Ja, hérna. Einhverntíma fyrir mörgum árum var ég að segja tilteknum einstaklingi þarna úr nágrenninu að ég hefði farið um Lyngdalsheiði á Laugarvatnsvelli frá Þingvöllum. Sá ávítaði mig alvarlegur í bragði, og sagði að þetta væri uppfinning Reykvíkinga að kalla þetta Lyngdalsheiði. Hann kallaði þetta Gjábakkaveg þarna yfir hraunið og benti mér á að kvartera grágrýtisdyngjan þar suður af væri hin rétta Lyngdalsheiði. Ég hef ekki fyrir mitt litla líf þorað annað en trúa þessu síðan. Skyldi geta verið að nafnið Gjábakkavegur sé upp runnið á skrifstofum Vegagerðarinnar, eins og svo margt annað? Mér dettur nú í hug eitt og annað í því sambandi, nefni sem dæmi þegar Vegagerðin talar um Djúpveg norður Strandir, ellegar leið hér í nágrenni mínu sem þeir kalla Þverárfjall, en mér skilst að þeir sem næst búa kannist ekki við það örnefni.
Tek undir með Snorra, það er brýn nauðsyn að fá svör við þessu. Trúlega er þetta lögfræðilegt viðfangsefni, doðrantar EU eru ófáir og manni er sagt að margt í regluverki sambandsins sé beinlínis misvísandi og oftar en ekki túlkunaratriði embættismanna sem þar ræður niðurstöðu. Það hlýtur á grunni upplýsingalaga vera mögulegt að fá svör við því í viðkomandi ráðuneyti, hvort og þá hvar sé að hafa upplýsingar um reglugerðir Evrópusambandsins um gerð og búnað ökutækja. Einnig má spyrja hann Örn Thomsen í Arctic Trucks í Noregi hvort hann og hans félagar þar ytra séu komnir eitthvað lengra en við hér á skerinu í upplýsingaöflun um þetta atriði.
Í mínu innleggi hér að ofan var ég að undirstrika að ég geri mér ljóst, að ekki er alltaf hægt að fara með opinberlega á flot allt það sem trúnaðarmenn þessa félagsskapar (sem annarra hagsmunasamtaka) eru að vinna að í sínum "lobbyisma", enda getur það spillt árangri að birta slíkt meðan niðurstaða er ekki fengin. Ég var alls ekki að gagnrýna stjórn fyrir það heldur var meiningin að benda á að maður er kannski að fjasa um hluti sem þið eruð komin miklu lengra með en t.d. mitt hugarflug nær og óska eftir skilningi á því. Það er út af fyrir sig nóg fyrir mig að vita, að þið séuð að vinna í tilteknum málum, svo sem eins og þessum slóðamálum, ekki endilega hvað þið eruð að gera. Minn ágæti kunningi Jón "Ofsi" Snæland þarf því ekki neitt endilega að rjúka upp á nef sér út af því þótt ég og aðrir sem standa utan innsta hrings beri fram kjánalegar spurningar!
Það má ljóst vera, að okkur óbreyttum félagsmönnum er fráleitt öllum ljóst hvaða starf forráðamenn klúbbsins á hverjum tíma inna af höndum, hvort sem er í stjórninni sjálfri eða nefndum. Þaðan af síður hvaða viðræðum þeir hafa staðið í við ráðamenn. Slíkt er bara eðli félagsmála og það verða þeir sem kjörnir eru til trúnaðarstarfa að hafa í huga, ef þeim þykir það sem einhver okkar setjum hér inn á þennan upplýsinga- og spjallmiðil byggja á fáfræði einmitt á þessu sviði. Svo sýnist mér auðsætt á ýmsu sem hér að ofan kemur fram, að stöku einstaklingar hafa eldað grátt silfur lengi og e.t.v. orðin allmikil stífni í þeim málum. En hvað umhverfisráðherra og ætlanir hennar í málefnum óbyggða og ferðaleiða varðar, þá óttast ég talsvert þá tilhneigingu stjórnmálamanna í krappri stöðu, eins og hún verður áreiðanlega í vor, að reyna að kaupa sér vinsældir tiltekinna hópa í þjóðfélaginu til að fá fylgi þeirra við sig. Örflokkurinn, sem hún tilheyrir, er á útleið í íslenskri pólitík, enda er hann í sjálfu sér nítjándu aldar fyrirbrigði. Hún þarf því á einhverju drastísku að halda ef hún ætlar að gera ráð fyrir að komast inn sem þingmaður aftur og ef haft er í huga, að fylgi það sem hennar flokkur hefur haft, hefur líklega ekki síst leitað til Vinstri grænna, sem hafa sett umhverfismál á oddinn og stundum verið ansi róttækir í þeim efnum. Henni gæti því verið í mun að reyna að ná einhverju af því fylgi til baka með því að hafa uppi stefnu sem líkist því sem þar tíðkast og ganga kannski í einhverjum þáttum lengra en þeir hafa gert. Af þeim sökum held ég að hafa þurfi mikla aðgát og fylgjast vel með hvað er að gerast á vettvangi löggjafans. Svo er það reyndar ekki gott að þessi Dagný mun ekki hafa í hyggju að halda áfram í pólitík og verður því ekki málsvari okkar á þingi eftir næstu kosningar.
http://www.visir.is/article/20061122/FRETTIR01/61122052
Er þetta eitthvað sem við þurfum að fylgjast með?
Þakka þér vals að undirstrika það sem ég gleymdi í langhundi mínum hér ofar um að láta aldrei bensín saman við diesel. Varðandi ísvara, þá eru til tegundir af ísvara, sem nýju eldsneytiskerfin (þ.m.t. spíssar og dýsur) þola. Þetta eru reyndar alveg fokdýr efni, en sama er um, eitthvað verður að gera til að eyða þeim raka sem þéttist innan á tönkunum. En það má minnka líkurnar á rakaþéttingu með því að gæta þess að hafa tankinn ævinlega því sem næst fullan. Nýjustu bílar eru einnig útbúnir þannig, að ýmsar gildrur eru á önduninni, bæði til að hindra að gufur frá eldsneytinu berist út í loftið, sem og að minnka rakann í því lofti sem tankurinn dregur inn á sig þegar hann tæmist. En það verður sennilega seint hægt að útiloka alveg að loft með eðlilegu rakastigi komist í einhverjum mæli inn í tankana.
Nú er undirritaður alls ekki handhafi prófa eða sérþekkingar á eldsneytiskerfum né dieselolíu. Reynslan kennir mönnum þó eitt og annað gegn um tíðina. Hér fyrir fleiri árum en ég þori að nefna man ég eftir að í leiðarvísi með Scania 76 og 56 typunum (sem sjást reyndar ekki lengur nema á stöku brotajárnshaug býst ég við) að þegar frostið færi niður fyrir -10 C° ætti að byrja að blanda með steinolíu (kerosene stóð reyndar í bæklingnum, þetta mun vera eitt og hið sama) en helst ætti ekki að fara fram yfir 10% íblöndunarhlutfall. Það sem meira var, það átti að bæta í allt saman tvígengisolíu, sem svaraði 10% af því magni af steinolíu, sem bætt var við eldsneytið. Vaxefnið, (paraffín) sem þykknar í olíunni í kulda, var ætlað til að smyrja hreyfanlega hluta eldsneytiskerfisins, en þessir hlutar fá ekki aðra smurningu en frá eldsneytinu sjálfu. Þetta, ásamt því að setja öðru hvoru ísvara (stundum bara ísoprópanol) á tankinn, dugði manni lengst af til þess að komast hjá vandamálum eins og stífluðum síum, sem oft gátu gert manni lífið leitt í frosti. Nú til dags er að því olíufélögin segja manni, blandað sérstökum efnum í olíuna til þess að minnka áhrif kulda á paraffínið, auk þess sem hlutfall þess í svonefndri "vetrarolíu" hefur verið lækkað. Manni er hinsvegar sagt, að hin elektrónísku eldsneytiskerfi, sem eru í flestum bílvélum nú til dags, þoli ekki að í eldsneytið sé blandað bensíni eða steinolíu. Ég hef því í seinni tíð látið ísvara duga, enda er full þörf á að nota hann, því talsverð rakaþétting verður alltaf innan á tönkunum í íslenska veðurfarinu, og þá ekki síður á bílum sem eru t.d. látnir standa inni í hlýjum bílskúrum á nóttunni, en bíða úti allan daginn á bílastæðum eftir eigendunum. Þótt þessi rakaþétting (condensation) sé ekki mikil að magni til, getur hún yfir lengri tíma safnast upp og endar með því að valda vandræðum þegar rakinn frýs og þá oftast á verstu stöðum í kerfinu. Ég endurtek að ég er ekki að leika neinn kunnáttumann í þessum efnum, þetta er fyrst og fremst fróðleikur, sem ég hef eftir mönnum sem vita og kunna að viðbættum smá skammti af reynsluvísindum.
kv. Ólsarinn.
Jú, þetta er svona "legend" Snæland, með Caterpillar, enda er verðlagningin í samræmi við það. En ég held að rafgeymar sem eru að gera sig hjá okkur trillukörlum dugi við flestar aðstæður, því það er stundum gengið ansi nærri þeim í bátunum.
kv.
Þeir geymar sem hafa reynst mér best í bátnum mínm, en þar reynir verulega á þá, eru frá fyrirtæki sem heitir Delphi – þetta eru lokaðir sýrugeymar. Tveir aðilar flytja þetta inn svo ég viti, annar þeirra er Stilling og hinn er Bílabúðin, Freyjugötu 9 á Sauðárkróki, versl.stj. heitir Benni og hefur símann 455 4570
Það eru einhverjir gaurar að gera við steingöt í framrúðum, þeir hljóta að ráða við göt á ljóskösturum, eða hvað?
