Forum Replies Created
-
Replies
-
Hvernig ætli "Yaris gellu á pinnahælum" eins og Stefanía orðar það svo skemmtilega, hefði reitt af á ferð þessa leið eins og veðrið hefur verið síðan um miðjan dag í gær, og verður fyrirsjáanlega fram yfir helgi?
Ég myndi spyrja hann Einar Kjartans – eik – hann er með þetta á hreinu.
Halldór Jónsson á Hólmavík, sími 861 6187
Þetta er ekkert rosa mál. Hann kemur í sömu festingar og í staðinn fyrir demparann á stýrinu. Síðan þarf að bora í stýrismaskínuna fyrir nipplum til að festa slöngu í milli maskínunnar og tjakksins. Ég held það sé ekkert vit í öðru en vera með tjakk, því "hrútshornið" sem togstöngin tekur í, hefur átt það til að bresta og þar með stýrið úr sambandi. Tjakkur gerir það að verkum að átakið dreifist og svo verður bíllinn ekki stýrislaus þótt hrútshornið fari í sundur. Þetta var gert á mínum bíl á sínum tíma af Árna Páli á Eldshöfða 15. Óhætt að tala við hann í 567 3444
Flott, Stefanía. Segir allt sem segja þarf. Amen.
Þessi hugmynd um Norðurveg um Kjöl er náttúrulega svo mikil breyting á meginmyndinni um samgöngur á Íslandi, að hún þarf að fá miklu meiri og skipulagða umræðu meðal þjóðarinnar en sem eitthvert argaþras á spjallþráðum. Ég er samt alveg á því að hún er nægilega geggjuð til að fara í gegn um Alþingi í þeirri mynd sem forystufólk Norðurvegar ehf. hefur lagt upp. Ég er nú svo óklár á nöfn, að ég veit ekki hvort einhverjir Eyfirðingar hafa lagt eitthvað til málanna á þessum þræði, en þeir Akureyringar sem ég hef heyrt tala um þetta mál á öðrum vettvangi en spjallþráðum 4×4 – þetta er ekki í fyrsta skipti sem til verður þráður um þetta mál – telja skipta mestu máli að komast sem beinasta línu milli Reykjavíkur og Akureyrar og sumir hafa meira að segja talið það rök í málinu að þurfa ekki að keyra um Húnavatnssýslurnar, sem er víst sérstök áþján ef maður er Akureyringur. Per se er alveg ótækt að þurfa að hlíta því að vegurinn verði í einkaframkvæmd og því þannig lagað séð í einkaeign og samhliða verði lokað fyrir að maður komist um þetta svæði nema með því að borga sig inn á slíkan veg. Svo held ég það væri allt í lagi fyrir þá sem hugsa sér slíkan veg sem heilsársveg, eins og mér skilst að hugmyndin sé, að fá Veðurstofuna til að gera yfirlit um veðurfar mánuðina nóvember til apríl frá 1965, þegar athuganir hefjast á Hveravöllum. – Ósköp er ég hræddur um að það yrði ansi oft að kalla út björgunarsveitir til að aðstoða fólk í vandræðum þegar veður versna og þarf engin aftök til í sjálfu sér. Ég þykist þokkalega kunnugur þessu svæði og veðurham, sem þarna getur skollið á fyrirvaralaust, þótt þokkalegt veður sé í byggð bæði fyrir sunnan og norðan. Það er ekki einu sinni víst að alltaf væri hægt fyrir björgunarsveitir að koma til aðstoðar í sumum tilfellum.
Það er nokkuð síðan þessar tvær vélar sem nefndar eru í upphafi þessa þráðar voru gerðar virkar. Þannig er mál með vexti, að fyrirtækið sem ég starfa hjá (ennþá) er með nokkra bíla, sem notaðir eru til ferða héðan til mannabyggða og til baka og annarra staða, sem þörf er á hverju sinni. Þessir bílar eru iðulega að fá sektir, og samstarfsmaður (sem er kona ef það skiptir máli) fær tilkynningarnar og þarf svo að finna út hver hafi verið á viðkomandi bíl í hvert skipti. Ég hef séð á þessum bréfum, að það er sektað við 94 km/klst. nettóhraða (að frádregnum þessum 3%) þannig að það er dýrt að sprella. Þetta snýst því fyrst og fremst um tekjuöflun fyrir ríkissjóð, því það er ekki fólkið sem ekur á milli 90 og 100 km hraða á þessum fáu beinu köflum á þjóðvegunum, sem er að valda slysunum. Enda á víst að stór fjölga þessum myndavélum í vetur og vor akkúrat vegna þess hve góðum tekjum þær skila í kassann. Mér skilst að þessar tvær hafi borgað sig upp á tveimur fyrstu vikunum. En það er ýmislegt fleira í sambandi við hraðasektir, sem maður myndi vilja nefna, en það er ekki þorandi hér á vefnum. Annað mál hvað maður gerir í beinum samtölum við félaga sína. Í þessum málum er því miður pottur brotinn, en fyrir hinn almenna borgara er nánast vonlaust að segja neitt eða gera, því þarna er sönnunarbyrðin öfug.
Þessi vegur verður lagður. Samhliða verður bannað að aka aðrar leiðir um Kjalarsvæðið. Það er nefnilega þannig, að margir af hörðustu "náttúruverndarsinnunum" vilja fá fáa svona vegi á hálendið, þ.e.a.s. uppbyggða vegi bæði Kjöl, Sprengisand og Fjallabaksleið nyrðri og öllum öðrum leiðum verður lokað. Ef þú vilt fara um önnur svæði verður þú veskú að reima á þig fjallgönguskó og bakpoka og labba, eftir að hafa greitt leyfisgjald sem fæst afgreitt gegn útfyllingu eyðublaðs í fimmriti. Afgreiðslufrestur aldrei lengri en 8 mánuðir.
Það er auðvitað hægt að kaupa einhvern ódýran kassa í RL og víðar, en ég mæli nú með kössunum frá Landsbjörgu/Hjálparsveit skáta, því þeir þola betur hnjask og verja innihaldið – sem er jú ekki ódýrt – miklu betur en kassar sem eru ekki ætlaðar til að geyma svona hluti. Þetta þarf að vera í lagi ef og þegar þarf að grípa til þess.
kv.
Þegar ég keypti mitt tæki snemma á árinu, þá var mér lofað því að ég fengi nýju uppfærsluna ókeypis. Ekki ódýrt, heldur ókeypis. Það voru ýmsir gallar í 3,0 svo sem eins og það að tiltekin örnefni, sveitabæir ofl. voru ekki rétt staðsett, t.d. öfugu megin við veg, bæirnir hérna út Reykjaströnd í Skagafirði voru út á miðjum firði og það var þannig líka í Eyjafirði og vafalaust víðar.
Ég er nú ekki hrifinn ef menn svíkja svona gefin loforð. Það var almennilegheita piltur sem ég man ekki nafnið á, ef ég hef þá heyrt það, sem ég talaði við þegar ég varð var við þessa galla og hann fullyrti að ég fengi nýja uppfærslu ókeypis í maímánuði. Svo þegar ég kom þar í byrjun júní, þá var sagt að þetta kæmi í september og í september var þetta ekki komið. Það hefur greinilega margt breyst í þessu fyrirtæki við eigendaskiptin. Svona þjónusta var ekki meðan þeir feðgar stjórnuðu.
Mikið er ég ánægður og sáttur við þetta sem kemur frá honum Lárusi Rafni. Ef menn gera þetta nákvæmlega eins og hann gerir ráð fyrir, þá er þetta gríðarlega mikið öryggi. Ég held að allir með nokkra reynslu af slarki og festum hafi séð hverskonar slys geta hlotist af þegar eitthvað gefur sig við drátt á föstum bílum. Ég hef fyrir mína parta haft mestu ótrú á öllu járnadóti í spottum, en viðurkenni hinsvegar kosti þess að hafa lás af þeirri gerð sem Lárus Rafn mælir með. Það verður heldur aldrei nógsamlega undirstrikað hvað það getur verið gagnlegt að henda einhverju ofan á tógið sem dregið er með, t.d. hönk af öðru tógi. Allavega þarf að gæta þess að þetta "eitthvað" tolli þar sem því er ætlað að vera en detti ekki af þegar verst gegnir. "Thumbs up for Lárus Rafn" hann á allt gott skilið fyrir góða lausn.
Gunni Egils (Ice-Cool) veit allt um þetta. Ég myndi byrja á að tala við hann. Veit einhver hvar sá gamli, guli er í dag?
Gott mál að halda örnefnum til haga og þakkir eiga þeir skildar sem að slíku standa. En nú er maður orðinn forvitinn og nú bíður maður eftir því að félagi Olgeir kveiki á tölvunni sinni og lesi þennan þráð. Ef hann veit ekki meira um þetta, þá er því miður ólíklegt að nokkur annar viti. Var að leita eftir þessu örnefni í því ágæta riti "Landið þitt" en það finnst ekki þar.
Það er ekkert ofboðslega langt síðan að einhver náungi var eitthvað fastur í að láta svona bíla hverfa. Hvar ætli hann sé núna sá?
Það eru svo sem lang mestar líkur á því að þessi bíll sé einhversstaðar á höfuðborgarsvæðinu, það er svo asskoti erfitt að halda svona leyndu hér í fámenninu – t.d. hér í kringum okkur Þórð Inga! En ég ætla rétt að vona að það sé ekki búið að rífa bílinn og selja hann í pörtum, þetta virðist svo heillegur og verklegur bíll að það væri eftirsjón að honum. Vonum það besta og höfum augu og eyru opin.
Mér finnst þessi umræddi Scout ekki þungur, þetta er svipað og eigin þyngd í venjulegum Pajero og hann er að spjara sig ágætlega á 38"
En ég verð nú að segja eins og er, að 44" Fun Country frá Dick Cepek fá helvíti mikinn mínus hjá mér fyrir það að bílar eru nánast ókeyrandi á vegi á þessum dekkjum, auk þess þykir mér sem þau vanti ansi mikið grip. Svo er mynstrið ekki þykkt og dekkin í það heila tekið andskoti þunn.
Best er að nota efni sem eru ætlað til að hreinsa tjöru og önnur föst óhreinindi af lakki. Olíuhreinsir, hreint White Spirit eða kerosene ("steinolía") eru ekki heppileg á bíla sem góðu lakki, allra síst þar sem sprautað er yfir litinn með glæru lakki eins og altítt er nú orðið. Því hættir til að eyða gljáa lakksins svo það verður matt áferðar. Margir tjöruhreinsar innihalda sabilene sem skilur eftir vaxhúð, sem er nú reyndar ekki af sömu gæðum og bón en skárra en ekkert. Annars hefur mér líkað vel tjöruhreinsirinn frá Undra. En fastasta tjaran fer yfirleitt ekki nema með fljótandi Sonax eða sambærilegu.
Ég verð nú að segja eins og er, að mér finnst margt sem maður les og heyrir í sambandi við gömul kerfi og ný að þetta snúsit svolítið um hvort einhverjir tilteknir aðilar geti grætt á því pening að selja okkur ný tæki, og símafyrirtækin samhliða geti selt okkur dýrari þjónustu. Það er ekki vafi, að NMT kerfið hefur verið að ganga úr sér að undanförnu, enda skilst mér að það sé ekki reynt að halda því við nema á fjölförnustu leiðum, sbr. þessar breytingar sem eru að gerast í kringum virkjunarsvæðin á Austurlandi. Lítil viðskipti= lítil þjónusta. NMT-kerfið er fjarri því að vera gallalaust, þótt það sé í þokkalegu lagi að öðru leyti. Það t.d. nýtist ekki til gagnaflutninga eins og vafalaust flestir vita betur en ég. Tóngæðin í sambandinu eru afspyrnu léleg og það slitnar alltaf dálítið í sundur þar sem sambandið er ekki á nægum styrk. En það virkar, og það er auðvitað það sem okkur skiptir mestu máli þegar tækin eru notuð þegar mikið liggur við. Ég er ósköp hræddur um að sjómannastéttin íslenska, sem er reyndar óðum að hverfa af sjónarsviðinu, muni sakna vinar í stað þegar NMT-kerfið verður lagt niður vegna þeirra kosta, sem það þó hefur, t.d. langdrægnina. En mig langar til að taka undir það sem eik segir hér að ofan um talstöðvar til að tala milli bíla og vekja athygli annarra á að lesa innlegg hans vandlega. Einar hefur mikla þekkingu á þessum fjarskiptamálum og mér finnst hann miðla henni á mannamáli, sem skiptir ekki minna máli.
Var ekki einhver að segja frá því hér á einhverjum þræði að til sögunnar væru að koma 59" barðar?
Veitir stóru, alvöru trukkunum frá Ameríkuhreppi nokkuð af 54"
Já, Skúli, ég held að L78-15 LT hafi verið undir Bronconum mínum og þótt bara ansi stæðileg! Í mínum kunningjahópi voru fyrstu svona alvöru vetrarferðirnar upp á hálendið á 33" tommu dekkjum og þótt ansi myndarlegt. Svo komu 35" en byltingin varð mest finnst mér í minningunni allavega þegar til skjalanna komu 36" Gumbo Mudder voru þau ekki 13,5" á breidd? Mig minnir að svo hafi menn farið að prófa 38" radial og 39,5" bias dekk. 44" var svo ansi lengi það myndarlegasta sem menn áttu kost á, var það ekki? – Annars held ég þetta sé allt saman orðið skráð í bækur.
Það var nú sagt í gamla daga að á mjóum þvengjum lærðu hundarnir að stela. Manni dettur nú í hug að forsjárhyggjan væri nú bara að smeygja tánni inn fyrir dyragættina, þá verði léttara um vik að koma öllum fætinum innfyrir. Það má sjá á þeim viðbrögðum, sem koma m.a. fram í dagblöðum í dag, að margir hafa áhyggjur af því að persónu- og ferðafrelsi verði ekki mikils virði þegar einu sinni er búið að koma þessum búnaði inn í bílana, því það er þegar að finna tillögur um að þessi búnaður verði notaður til að sýna hvaða bifreiðir séu að fara fram úr hámarkshraða á hverjum tíma. Ennfremur munu tilteknar opinberar stofnanir vilja fá möguleika á að geta séð hvað hver bifreið er stödd á hverjum tíma. – Aukið eftirlit með "hraðakstri" hefur ekki minnkað ofsaakstur sýnist manni, þótt stóra bróður hafi upp á síðkastið tekist að stórauka tekjur ríkissjóðs af hraðasektum með því að sekta fólk fyrir að aka á 94 km hraða þar sem hámarkið er 90 km – og þá spyr ég, er fólkið sem er að aka milli 94 og 100 km hraða þeir sem eru að valda tjónum? – Í framhjáhlaupi langar mig að minnast á það sem kemur fram í einu dagblaði (24 st.) í dag um að stórir jeppar valda mun færri tjónum en önnur ökutæki. Nú er það sumsé orðið staðfest af opinberri nefnd – sem við vissum náttúrulega allan tímann.
