Forum Replies Created
-
Replies
-
Sammála síðasta ræðumanni. Greiði þeim báðum atkvæði.
Nýjárskveðjur til allra.
Blaðið er fínt, fékk það með skilum þegar ég kom hingað norður á öræfin eftir að hafa verið í mannabyggðum um jólin (að spilla barnabörnunum) . Varðandi slóðamálin, þá var ég einmitt í þessari ferð að fá nýju uppfærsluna af kortinu í GPS-göngutækið mitt (Garmin GPS 60CSx) og mér sýnist að allmikið af slóðum sé komið þar inn. Hef ekki haft möguleika enn á að prófa neinn slíkan enn sem komið er, en vona bara að þeir sem skrifa þetta forrit hafi notið þrotlausrar vinnu Slóðríks Ofsa og við getum því vænst þess að þetta séu réttir slóðar. Það er nú oftar en ekki að brautryðjendastarf eins og það sem Ofsi er að vinna sé vanþakkað. Davíð heitinn Stefánsson frá Fagraskógi orðaði það svo snilldarlega í kvæðinu "Konan sem kyndir ofninn minn" – "það njóta fæstir eldanna sem fyrstir kveikja þá". Ég held að við 4×4 félagar skuldum Jóni Snæland ansi miklar og stórar þakkir fyrir hans vinnu við slóðana og ýmislegt fleira, sem hann hefur á sig lagt fyrir okkur. Gleðilegt nýtt ár öll sömul og megi komandi ár verða ykkur gæfu- og ferðaríkt.
Ofsi minn, mér sárnaði alveg óskaplega að þarna fremst í blaðinu er ekki minnst á Skagafjarðardeildina. Við erum að vísu ekki merkilegasta deildin, veit ég vel, en við erum til eigi að síður.
Ég reyndar vissi um þetta, ágætu vefsíðusmiðir, en þetta virðist ekki vera nógu augljóst fyrir marga, allavega hef ég heyrt í fólki, sem ekki hafði áttað sig á þessu. Þessvegna datt mér í hug hvort ekki ætti að hafa beinan tengil á forsíðunni, sem héti beinlínis "veðurspár" eða eitthvað ámóta sem ekki er hægt að flækja sig í eða misskilja. Alls ekki þannig meint að ég sé að gera lítið úr ykkur, sem hafið lagt á ykkur mikið starf við að gera þessa síðu sem besta úr garði.
Já, það eru allmargar ágætar síður sem hægt er að vísa á. Spáin þeirra á Dunhaganum er vissulega alveg ágæt yfirleitt, en eins og aðstandendur hennar taka fram, þá er hún algjörlega tölvuunnin og þarf að hafa það í huga. http://www.wetterzentrale.de/pics/avnpanel1.html
er 9 daga spá um loftþrýsting og lofthita, sem margir nota, einnig er norska síðan http://www.yr.no/sted/Island/
nokkuð notuð af ýmsum og fleira mætti telja. Það er í sjálfu sér ekki aðalatriðið í mínum huga hvaða síðu menn nota, heldur að fólk noti einhverjar viðurkenndar veðurspár. Mér finnst sjálfum að spár Veðurstofu Íslands séu í það heila tekið áreiðanlegastar og á heimasíðu þeirra eru ýmsar útfærslur á spám, bæði myndrænar (veðurþáttaspár) og textaspár. En það er auðvitað persónubundið hvaða augum menn líta silfrið eins og verða vill.
Í framhaldi af atburðum dagsins, þá veltir maður fyrir sér hvort ekki væri ráðlegt að hafa meira áberandi tengil á forsíðu vefsíðu klúbbsins við heimasíðu Veðurstofunnar og aðrar veðurspásíður. Mönnum gæti dottið í hug að að það vefðist fyrir einhverjum að koma sér í samband við veðurspár. Fólk er nú ekki alltaf að hlusta á útvarp og/eða horfa á sjónvarp á þeim tímum sem veðurfregnir eru fluttar og á það ekki síst við um þennan árstíma, þegar margt annað tekur athyglina. Ekki er síður gagnlegt að kíkja á bloggsíðu Einars Sveinbjörnssonar, veðurfræðings, http://esv.blog.is/blog/esv/
en hann birtir oft ágætar helgarspár til viðbótar við alls kyns fróðleik um veður.
Bara svona til umræðu og skoðunar
Góðar kveðjur til allra ásamt með þakklæti til björgunarsveitanna, sem hafa að venju komið til hjálpar þegar á reið.
RÚV segir á heimasíðu sinni að ferðafólkið á Langaskafli sé komið yfir í bíla björgunarsveitanna.
Við óskum þeim öllum góðs á heimleiðinni.
Tek undir hvert orð félaga Skúla hér að ofan, rök hans eru pottþétt og framsetning hjá honum til fyrirmyndar. Typiskt fyrir Skúla að geta rætt svona viðkvæmt mál án þess að vera með ofstopa og stóryrði. Takk.
Meðal annarra orða: Gleðilegt nýtt ár félagar góðir og vonandi eiga allir framundan farsælan ferðavetur.
Kúnstirnar sem þeir leika á BobCatinum þarna í videounum sem koma þarna á eftir.
Meira að segja lítið tæknióður, gamall skarfur fór að skilja smá. – Nú er það svo, að margur maðurinn er að nota NMT sem síma í dag, án þess að vera að ferðast á fjöllum. Notendahópur kerfisins er sumsé allmiklu stærri og tekur til fleirri aðila en fjallaferðafólks. Ég geri mér í hugarlund að þessu CDMA2000/450 kerfi sé ætlað að veita svipaða þjónustu til nánast sama markhóps og NMT gerir í dag. – Ég hef spurt þá sem eru að nota Tetra nú þegar, þ.e.a.s. lögreglu, slökkvilið og mína gömlu félaga í björgunarsveitunum um Tetra og þeir láta vel af því með þau not í huga sem þeim er mikilvægast. Þeir leggja hinsvegar áherslu á að þetta sé ekki sími og ennfremur að almennur notandi yrði að gera sér að góðu að verða blokkaður út ef neyðarþjónustan þarf að nota kerfið. Það er fyrst og fremst ætlað til að þjóna þeim og þá hafa þeir forgang – að sjálfsögðu. Nú er það einnig svo með mörg okkar, að kostnaður skiptir máli. Við höfum sum takmörkuð fjárráð, þótt við höfum gaman af að ferðast en höfum ekki efni á að vera með allt það dýrasta og besta. Kannski er svarið einfaldlega það að hafi maður ekki ráð á öllum dýru græjunum, eigi maður að finna sér eitthvert annað sport, og vera ekki að troða sér inn á leiksviðið þar sem maður geti hvort eð er aldrei orðið fullgildur meðlimur?
Ég hef ekki tekið þátt í þessari skoðanakönnun enn. Verð bara að viðurkenna að ég tek undir með Einari Kj. að þetta er of leiðandi könnun. Það er ekki minnst á VHF – líklega gengið út frá því að menn séu allir með það þegar – og ekkert svona "annað", sem möguleiki, sem vel getur verið til, ekki veit ég, nú og svo þetta með þetta BDSM-kynlíf á 450 megariðum, (afsakið, það heitir víst CDMA2000) sem er ekki einu sinni víst hvort er yfirleitt valkostur. Mér sýnist að gerfihnattasímar, hvað sem þeir nú heita, séu yfirleitt svo fjári dýr valkostur að það séu varla nema auðjöfrar sem hafa efni á að borga fyrir slíkt. Fyrir nú utan að það lítið ég veit um tæknihliðina, þá eru samskiptatunglin það lágt á lofti héðan frá Íslandi, að "skuggamyndun" er óviðunandi, enda skilst mér að markhópurinn fyrir þessa síma sé fyrst og fremst skip á úthöfum. Kannski hef ég misskilið eitthvað í þessu sambandi, enda er maður hvorki radioamatör né verkfræðingur, og svo er nú með okkur flest. En mér er mjög til efs að Tetra getið uppfyllt þær væntingar, sem við flest höfum til svona samskiptakerfis. Lágmarkskrafa er að við fáum a.m.k. ekki lakari möguleika en NMT kerfið (bráðum sáluga) er eða réttara sagt var að veita.
Það verða nú seint allir sammála í svona fjölmennu félagi, en svona naflaskoðun er að mínu viti alveg bráðnauðsynleg, en við þurfum þá líka öll að sýna þann þroska að halda okkur á málefnalegum nótum. Það er reyndar gert óvenju mikið á þessum þræði og er það hið besta mál. Einn kosturinn við að hafa nefndir um sérstök mál og málaflokka er sá, að það virkjar fleiri til þátttöku í félagsstarfinu og dreifir álaginu, sem ég hef trú á að verði oft ansi mikið á þá sem eru í aðalstjórn og þá ekki síst formann hverju sinni. Fólki er reyndar mislagðar hendur við að vera í forystu fyrir slíku starfi, og mörg okkar eru býsna mikið störfum hlaðin dags daglega og því kannski viðbúið, að einhver félagsleg verkefni verði útundan. Þetta er náttúrulega mikið verkefni og oftar en ekki spurning um verklag. Í tengslum við annan þráð sem er í gangi hérna dettur mér í hug, að það gæti verið nauðsynlegt að koma á tengingu inni í samgönguráðuneyti sem tryggi að allar breytingar á reglugerðum um gerð og búnað ökutækja verði sendar til umsagnar hjá tækninefnd og stjórn f4x4 svo við lendum ekki í því að standa frammi fyrir orðnum hlut eins og með ljósagrindurnar og spilfestingarnar. Nú ætla ég mér ekki þá dul að fara að hafa skoðun á því hvaða nefndir séu nauðsynlegar og hverjar ekki. Það þarf bara að ræða á málefnalegum grunni og komast að niðurstöðu. En ég vil ljúka þessu á því að undirstrika þá skoðun mína, að það er mjög þarft verk hjá Ofsa vini mínum að koma þessari umræðu af stað.
Vil byrja á því að taka undir með Þorvaldi sveitunga mínum með það að ástæðulaust er að fara rangt með örnefni. Hjalti Kristgeirsson, sem hefur m.a. ritstýrt Árbók Ferðafélags Íslands í mörg ár hefur skrifað snjalla og þarfa pistla um örnefni og örnefnanotkun og þarflaust að illa ritfærir menn eins og ég fari ofan í það. En það er með blessaða Vegagerðina. Seint mun hún hljóta í huga mínum allavega, sess sem eitthvert "átórítet" varðandi örnefni. Þeir hafa gegn um árin sýnt tilhneigingu víðar en þarna að gefa vegum nafn með tilvísun til örnefna, alveg án tillits til þess hvort það er í takt við viðurkennd örnefni. Núna þessa mánuðina er verið að vinna við nýja vegtengingu vestur á firði úr Geiradal eða öllu heldur Gautsdal í Austur-Barðastrandarsýslu sem var, yfir Þröskuld og niður Arnkötludal. Þennan veg vilja þeir kalla Tröllatunguveg. Kemur hann þó hvergi inná land Tröllatungu, né liggur hann um Tröllatunguheiði, enda tilgangurinn með vegalagningunni per se að komast hjá því að fara um nefnda heiði og færa vegstæðið þangað sem það er lægra yfir sjávarmáli. Nú, það liggur vegur hér milli Blönduóss og Sauðárkróks, sem nýverið hefur verið endurbættur og Vegagerðin kallar Þverárfjallsveg. Kunnugir segja mér að Þverárfjall sé hvergi til sem örnefni. Hluta af leiðinni er farið um Laxárdalsheiði, en það örnefni finnst ekki í bókum Vegagerðarinnar. Mér finnst sjálfum alltaf skrítið að maður sé að aka Djúpveg norður allar Strandir, en svona er það nú samt.
Þetta var fróðlegur pistill og mig langar til að copy/paste hann og geyma ef þú hefur ekkert á móti því.
Ég held að mín stöð sé enn á skrá hjá P&F, allavega greiði ég eitthvert gjald af henni til þeirra árlega. Ég var á sínum tíma með kallmerkið K 175 sem breyttist svo síðar í bara 175 – held að það sé það sem er skráð á mig núna hjá stofnuninni. Það er ekki mjög langt síðan ég prófaði hana, þá var hún í góðu lagi og hún er vel varðveitt uppi á hillu í bílskúrnum mínum við stofuhita. Þessar Yaesu-stöðvar frá honum Sigga voru déskoti góðar, ég var áður með bandaríska stöð með tvíhliðabandsmótun, sem ég man ekkert hvað ég gerði við, líklega hef ég bara hent henni þegar SSB stöðin kom til skjalanna. Bölvuð vitleysa náttúrulega, það væri allt í lagi að eiga hana sem safngrip núna. Á tímabili átti ég svo SSB – stöð frá Landssímanum, en hún var talsvert fyrirferðarmeiri en Yaesu-stöðin og þar af leiddi að ég seldi hana.
En manni finnst maður vera hálf sambandslaus eftir að þetta kerfi hætti að vera almennt í notkun. Tek undir með þér að þeir sem eiga svona stöðvar ættu að sameinast um að koma þeim í brúk og nota þær. Efast ekki um að það gæti komið sér vel einhverntíma, sérstaklega þegar eitthvað ber út af.
kv.
Tek undir með runari – ég ók mínum á þriðja hundrað þúsundið án þess að hrútshornið gæfi sig. Hinsvegar var settur strax vökvatjakkur á millibilsstöngina um leið og bílnum var breytt.
Nú á ég ennþá gömlu Yaesu-stöðina sem ég keypti hjá honum Sigga okkar Harðar í uralten zeit einhverntíma (gætu verið allt að þrjátíu ár síðan!) ásamt með loftnetinu með spólunum tveimur (veit ekkert hvað ég er að tala um tæknilega, heldur bara þetta sem hver maður sér). Nú spyr ég í samræmi við mitt takmarkaða vit og þekkingu; eru þessar stöðvar nothæfar enn þann dag í dag? Get ég hlustað á aðra sem hugsanlega eru með samskipti á 2790 og 2833 eða hvað það nú var sem var notað af tíðnum? Og maður tali nú ekki um að maður get sent líka þannig að aðrir heyri? Þessi stöð er t.d. ekki með CE-vottun, hún er það gömul.
Ég veit ekki hvernig hann fékk þennan disk með ferðamyndum Stöðvar 6 – gæti hugsast að Stefán gjaldkeri, sem er sveitungi Óskars bónda á Steiná, hafi haft þar hönd í bagga. En þetta var satt að segja hin ágætasta skemmtun og ekki var það til að setja mann í fýlu að sjá hvað þeir eru á öflugum bílum. Maður fékk fiðring við að sjá Suburban – Chevyinn á 46" dekkjunum, ellegar 6×6 bílinn hans Gunna Júl frá Sigló. Aldeilis ljómandi. En meðal annarra orða; ég hef fregnað að Ferðafélagið hér ætli að loka Ingólfsskála núna um eða fyrir áramótin. Þau eru að gefast upp á að reka skálann, það fara aldeilis ókjör af gasi þarna innfrá en það kemur smátt í kassann. Ef ég skil rétt, þá verður þarna samskonar fyrirkomulag og er víða annarsstaðar, það verður eitthvert lykilorðakerfi sumsé. Allt í lagi að menn viti þetta því margir koma þarna við og einhverjir gista líka þykist maður sjá.
Það er náttúrulega alveg sjálfsagt að gera grín að okkur sveitapakkinu. En þú veist nú vel hvað Stöð 6 er, Tryggvi! – Þetta er greinilega gríðarlega skemmtilegur félagsskapur og vel akandi eru þeir, það er ekki vafi, og láta ekki hlutina verða að vandamálum. "Er eitthvað að, Stjáni?" – "Nei, ekkert"
Skagafjarðardeildin var með desemberfund sinn í kvöld. Fundarefni var m.a. áform um sameiginlegar ferðir í vetur og verður sú fyrsta væntanlega árleg aðventuferð að Skiptabakka á laugardaginn, þ. 8.12. – Svo eru áform um stóra ferð síðar í vetur, en áætlanir um hana eru að taka á sig mynd. Svo voru sýndar myndir úr ferðum klúbbfélaga frá síðasta vetri og einnig mynd frá Stöð 6 og ferð þeirra félaga um miðhálendið.
Flottur fundur og vel undirbúinn og við óbreyttir þökkum stjórninni okkar fyrir skemmtilegan fund.
mörg svör um hvað sé best. Þegar upp er staðið er spurningin oftast um hversu mikið fé maður hefur ráð á að setja í bílinn. Ef þú ert í þeirri stöðu að geta breytt bíl sjálfur, án þess að þurfa að kaupa mikla vinnu við breytingar, þá er auðvitað hægt að fá nokkrar tegundir og árgerðir á viðráðanlegu verði. Þá verður spurningin oft hvort það borgar sig að setja þá fjármuni og vinnu sem það útheimtir í viðkomandi bíl og þá þarf að hafa a.m.k. annað augað á því hvert er endursöluverð breyttra bíla af viðkomandi tegund, því það er nú einhvernveginn þannig, að aðstæður breytast og þótt maður ætli sér að eiga viðkomandi bíl lengi, þá geta óviðráðanlegar kringumstæður leitt til þess að maður eigi ekki annars úrkosta en selja. Nú, það er búið að breyta það mörgum bílum á Íslandi, að það er fjöldinn allur af breyttum bílum til sölu og e.t.v. er nauðsynlegt að útiloka ekki þann möguleika í upphafi. Ef maður lætur ekki plata sig því meira, þá ætti að vera möguleiki að afsetja bíl á svipuðu verði og maður keypri, þ.e.a.s. ef ekkert hefur gerst í millitíðinni sem hefur mikil áhrif á verðmætið. En mig grunar, að sem fyrsti bíll sé góður HiLux skársti kosturinn, hvort sem þú kaupir hann til að breyta honum sjálfur eða kaupir breyttan. Þú tekur allavega minnsta áhættu í flestum tilvikum.
