Forum Replies Created
-
Replies
-
Þetta er frábær myndasería og fagmannlega gerð í alla staði. Gefur þeim sem ekki komust á sýninguna greinargóða mynd af því sem þarna var á boðstólum. – Mikið var gaman að sjá að Ívan Kassaviský (guðséloff!) er "alive and kickin´the dust" Ellegar að sjá þarna a.m.k. tvo Ford herjeppa árg. 1942. Aldeilis hreint frábært.
Spekingar hafa sagt manni, að það þurfi að stækka vatnskassann við 6 cyl. 2,8 lítra vélina í Patrol. Þessi vatnskassi, sem bíllinn komi með, sé ekki nógu afkastamikill, þegar eitthvert álag er á bílinn, svo sem við drátt og í þungu færi í snjó. Sel það ekki dýrara en ég keypti, en þetta var t.d. þekkt vandamál í gamla Bronco (6 cyl.) Þetta eru svo sem alveg fullgild vísindi þannig lagað séð, en eins og margar aðrar lausnir, kostar hún peninga. En hvað sem hver segir, þá er þessi mótor alveg ágætur út af fyrir sig.
Tek undir það sem hér hefur verið sagt að aksturslag er eitt þýðingarmesta atriðið hvað varðar eyðslu í almennum akstri. Annað atriði er að hafa vélarnar vel stilltar, slithlutir séu endurnýjaðir reglulega skv. fyrirmælum framleiðanda, hver svo sem tegundin er, loftþrýstingur í hjólbörðum sé hæfilegur o.s.frv. Hitt er svo annað mál, að þegar ekið er t.d. á snjó, eins og okkur þykir nú hvað skemmtilegast, þá verður stundum að standa "pedal to metal" til þess að komast þangað sem maður ætlar sér. Þá þýðir ekki að vera í sparakstri. En jafnvel í snjóakstri er hægt að beita ákveðnum "hagkvæmniakstri" og þar hefur líka mikið að segja að vélin og allt það sem hún þarf á að halda til að ganga, sé í góðu lagi og vel stillt.
Kjartan P. Sigurðsson ljósmyndari er með góðar seríur af þessu svæði á bloggsíðunni sinni.
Sælir félagar! – Við hjónin erum búin að eiga nokkra Pajeroa og bæði með 2,5 lítra diesel, 2,8 diesel og svo núna 3,2 l
Fyrstu bílarnir voru beinskiptir en núna er farartæki frúarinnar sjálfskipt. Þessi nýjasti eyðir langsamlega minnstu af þeim öllum, þrátt fyrir að vera þyngstur og með stærstu vélina. Tækniþróun fleygir hratt fram, það er enginn vafi á því. Við áttum 2,8 bíl sem var einn af "síðustu móhíkönunum" eða úr árgerð sem er ýmist kölluð 1999 eða 2000 hjá þeim í Heklu. Okkar hét 1999 þegar þeir tóku hann upp í nýjan KIA Sorento, en var orðinn 2000 þegar þeir auglýstu hann til sölu! En þessi bíll var reyndar beinskiptur, svo ég geri ráð fyrir að fyrirspyrjandinn hafi lítið gagn af okkar tölum. En við komum þessum bíl niður undir 9 lítra á 100 km í þjóðvegaakstri, þegar hann dró ekki kerru eða neitt þess háttar. Með 800 kg fellihýsi aftaní fór hann með í langkeyrslu 11,8 – 13,7 eftir því hvernig vegakerfið var og vindstöðu. Fellihýsi og hjólhýsi taka mikið til sín í vindi. Í innanbæjarakstri var þessi bíll að eyða frá 12 – 13 lítrum að sumri upp í 16 – 17 að vetri til. Þessi nýi – 2008 árgerð – hefur komið okkur afskaplega þægilega á óvart hvað varðar eyðslu, við höfum komið honum niður í 7,46 l/100 km í langkeyrslu. Það er ansi gott á bíl sem er um 2,5 tonn með öllum búnaði. En ég minntist á KIA Sorento. Við vorum með tvo svoleiðis, fyrri bíllinn var með 140 hö vélinni og hann var alveg í lagi með eyðslu, eyddi þó meiru en Pajeroinn með 2,8 vélinni. En svo fengum við annan með 170 hö vél 2,5 lítra, og sá olli okkur miklum vonbrigðum. Hann fór upp í 24 l/100 km í snatti að vetri til. Það þótti okkur of mikið, auk þess sem hann var almennt í 12 – 14 í langkeyrslu. – Það er rétt að geta þess, að báðir KIA bílarnir og 3,2 Pajeroinn voru óbreyttir, en 2,8 Pajeroinn var breyttur fyrir 35" en var mest ekið á 33" En við höfum aldrei átt Land Cruiser, þótt okkur hafi oft langað í svoleiðis bíl, því Toyota er auðvitað það sem alla dreymir um að eiga………..
Sæll Guðni og þakka þér allt gamalt og gott!
Einu sinni átti ég frambyggðan rússajeppa, (UAZ)hann var með þessari Timken-stælingu rússanna og með fjöðrum í sleðum í staðinn fyrir laus hengsli, sem var auðvitað mikil framför frá því sem var á gamla Willy´s sem var minn fyrsti bíll. Það er mikið til sami undirvagn og vél í UAZ og í GAZ typunni með "húddinu". Það var talsvert meira um UAZ typuna en GAZ bílana, en ég veit ekki betur en ýmislegt eigi að passa á milli úr gangverkinu. En myndirnar segja manni að það komi þér að litlu gagni, félagi Guðni! Ekki man ég eftir neinu heillegu eintaki af GZ 469 hér á okkar slóðum, en hefurðu spurt Þorvald Óskarsson á Sleitustöðum? Eða þá hann Björn okkar Sverrisson, fornbílabjargara hér á Króknum? En nú sýnist manni að það sé komið erindi fyrir mann úteftir, það er líka komið á annað ár síðan undirritaður hefur druslað sér út á Siglufjörð og kominn tími á að kíkja til nágrannanna. En maður verður svo helvíti værukær og latur að fara eitthvað nema það allra nauðsynlegasta þegar maður er orðinn svona gamall.
……….jú, mikil ósköp, það er áreiðanlega til fólk sem veit hverjir þetta voru. En mín reynsla er nú sú, að þeir sem vita, þora ekki að segja, því þeir sem gera ámóta skammir af sér, hafa hreina unun af því að ógna fólki og beita það ofbeldi, ef þeir hafa minnsta grun um að það haldi ekki kj…. – þannig að vonin um að einhver "syngi" er ekki stór, held ég allavega.
Já, drullusokkar eru víst til alstaðar og engin leið að komast hjá því. Því miður fer þeim líka fjölgandi. Það er að verða mikið vandamál með gæslulausa skála á fjöllum, hvernig um þá er gengið. Því miður þykir sá mestur í þessu þjóðfélagi sem kemst upp með að hafa rangt við, í hverju sem það er. Manni sýnist þeim hossað sem mestu hafa stolið frá þjóðinni. Því miður virðist ekki duga að læsa skálunum, þá eru þeir bara brotnir upp og skemmdirnar enn meiri. Þetta endar varla nema á þann veg að allir gefast upp á að halda úti skálum, allavega þar sem ekki er talin grundvöllur fyrir gæslu. Ég sá einu sinni leiðarvísi frá þýskri ferðaskrifstofu, sem listaði upp fyrir menn hvaða skálar væru án gæslu, því þar mætti komast hjá útgjöldum, íslendingarnir væru svo fávísir að þeir settu mönnum það í sjálfsvald hvort þeir greiddu eða ekki og það þekktist ekki í landinu bláa að það væri verið að eltast við menn sem ekki greiddu. Þýskur ferðamaður rak þennan bækling upp í nefið á mér þegar ég vogaði mér að spyrja þá hvort þeir greiddu fyrir gistingu í Ingólfsskála, sem þá var reyndar opinn. Ég var þarna einn á ferð með konu minni og þessi 14 manna hópur gaf það fyllilega í skyn að þeir væru ofurefli mitt ef út í það færi. Ekki þar fyrir, þetta fólk var ekkert að skemma, en þeim fannst allt í lagi að nota gas og annað sem húsinu fylgdi.
Svona bollaleggingar eru með því alskemmtilegasta sem ég les á vef 4×4, segi nú bara fyrir mig! En varðandi Djöflaskarð og tilurð þess örnefnis (og líklega fleiri slíkra) þá er ein slitnasta og mest handfjatlaða bók í mínum bókahillum rit sænska jarðfræðingsins Hans W:son Ahlmann um Vatnajökulsleiðangur þeirra félaga, hans og og Jóns Eyþórssonar árið 1936. Bókina þýddi sá ágæti stílisti og meistari íslensks máls, Hjörtur Pálsson. Örnefnið Djöflaskarð varð til er þeir urðu að sæta því að verða þar veðurtepptir dögum saman í hinu versta óveðri. Með þeim vísindamönnum voru fjórir aðrir í leiðangrinum, tveir svíar og svo íslendingarnir Sigurður Þórarinsson, þá við nám í vísindagrein sinni, og Jón Jónsson frá Laug, sem var hið mesta karlmenni og maður fær þá mynd af honum eftir lestur bókarinnar, að líkamsburðir hans og þolgæði hafi jafnvel bjargað því að ekki fór illa fyrir ferðalöngunum. En þessi leiðangur mun hafa verið fyrsti alvöru vísindaleiðangur á nútímavísu á jökulinn og í raun upphaf þeirra miklu rannsókna, sem fram hafa farið á honum. Mæli eindregið með því að þeir, sem þess eiga kost, lesi þessa ágætu bók, en hún er trúlega til á flestum alvöru bókasöfnum, og svo náttúrulega hjá stöku sérvitringi og nördum eins og undirrituðum.
Ég er nýkominn af upprifjunarnámskeiði hjá því góða fólki í Sæbjörginni, slysavarnaskóla sjómanna, og þar sem viðbrögð við eldsvoða eru stór þáttur í því pensumi og reyndur slökkviliðsmaður kennir, sem er þess utan gríðarlega vel að sér í þessum málum, spurði ég hann um dufttæki og hvað væri rétt og heppilegt í þeim. Hann sagði hreint út, að það væri nú orðið svo, að ódýr og góð tæki, sem fengjust nú viða, t.d. í Europris, kostuðu minna en áfylling hjá innlendum stöðvum og því skyldu menn alvarlega athuga hvort ekki væri betra að henda tækjunum og kaupa ný þegar þarf að skoða þau, áfyllingin kostaði í sumum tilvikum meira en nýtt tæki! Þeir kynntu okkur þessi nýju tæki sem getið er um hér að ofan og töldu þau lofa góðu, en enn sem komið væri hefðu yfirvöld ekki viðurkennt þau og meðan mál stæðu þannig, gæti maður ekki fengið skoðun út á þau.
Slökkvitæki, fullkomlega lögleg og miðuð við norska staðla, sem eru ekki vægari en íslenskir, fást í Europris. Ég keypti mér viðbótartæki þar í vor til að bæta við þriðja slökkvitækinu í bústaðinn. Hefði þessvegna getað fengið a.m.k. tvö 6 kg tæki þar fyrir það sem algengt er hér fyrir sambærileg tæki.
Flestir vita held ég í prinsippinu hvernig olíuvinnsla fer fram. Fyrir þá sem ekki vita, má setja upp grófa mynd af því þannig, að jarðolía er hituð. Við hitunina skiljast mismunandi rokgjörn efni í olíunni að, ef við hugsum okkur tank með jarðolíu, þá skiljast þau að (þetta er einfölduð mynd) þau léttustu verða efst en þau þyngstu neðst. Efst væri þá gasið, næst bensín, síðan kæmi steinolía eða þotueldsneyti, sem er nánast sami hluturinn, svo dieselolía, svo svartolía af ýmsum gerðum og síðast asfalt. Það kemur nánast sama magn af diesel og bensíni út úr hverri rúmmálseiningu af jarðolíu (mismunur milli svæða skiptir ekki meginmáli hér) þannig að ámóta magn er til reiðu af hvoru fyrir sig. Notkun á dieselolíu hefur aukist miklu meira en notkun á bensíni, þannig að hlutfallslegt framboð af dieselolíu er alltaf að minnka. Dieselolía er náttúrulega notuð á samgöngutæki og til húsahitunar og svo framvegis, þannig að notkun á henni eykst sífellt, hlutfallslega vel að merkja. Á þetta spila svo spákaupmenn.
Leiðin norðan Hofsjökuls er yfirleitt heldur varasöm um miðjan júlí. Aflaðu þér allavega góðra upplýsinga um hana áður en þú leggur í hann. Árnar á leiðinni eru sumar hverjar nokkuð varasamar. Formaðurinn okkar hér í Skagafirði, Hilmar A. Baldursson, er ansi kunnugur þessari leið og fylgist vel með hvernig vatn er í ánum, – það sést í byggð og hans fólk býr við þessar ár þar sem þær koma í byggð. Mæli með að þú hafir samband við hann áður en þú ferð þessa leið – þ.e. miðað við miðjan júlí. Eftir að komið er fram yfir 20. ágúst eða svo, er frekar farið að minnka í ánum og auðvitað hefur hitastig yfir daginn mest áhrif á vatnsmagnið.
kv. og góða ferð.
Eiginlega gerði ég mér ekki ljóst fyrr en ég las góðan pistil Skúla að vandinn liggur í því að skilgreind merki eru ekki til fyrir þessar séríslensku lokanir. Í Evrópsku umferðarmerkjareglunum eru líklega ekki til merki sem uppfylla þessi skilyrði, vegna þess að þar er þessi möguleiki ekki fyrir hendi. Svo er nú líka málið, að það spyrst fljótt út að hægt sé að komast upp með ýmislegt hér á landi vegna þess að lögreglan gerir ekkert í málinu, trúlega mest vegna skorts á mannafla og tíma. Ýmiskonar upplýsingar ganga milli fólks sem hyggur á ferðir hingað. Ég sá einu sinni fyrir tilviljun kort frá þekktri þýskri ferðaskrifstofu, sem hefur mikið komið við sögu í Íslandsferðum. Þar voru sérstaklega merktir skálar á hálendinu, þar sem EKKI var gæsla og tekið fram að þar væri hægt að gista án þess að borga nokkuð.
Ég er auðvitað alveg hjartanlega sammáli Magnúsi H. Norðdahl að maður á að taka myndir, þ.e.a.s. ef maður er vitni að þessu. Hitt er annað mál, að við sem hlýðum reglunum erum bara ekkert á ferðinni á hálendinu á þessum tíma. En, ég er nokkuð kunnugur starfi björgunarsveita og ég veit að þegar þeir eru á svokallaðri hálendisvakt, þá taka þeir myndir af t.d. eindrifs bílaleigubílum, sem eru rækilega merktir með aðvörunarmiða um að þeir megi ALLS EKKI aka á F-merktum vegum. Einnig mynda þeir bíla sem aka utan viðurkenndra leiða og slóða og skilja eftir sig ummerki. Það er nú lítið gert með þetta, aldrei kært eða neitt. Ég tek undir með Benedikt hér fyrir ofan; déskoti er magnað ef enginn verður var við þessa og þvílíka ferðalanga. Þetta er nefnilega miklu algengara en sumir vilja viðurkenna og þetta er undantekningalítið liðið sem kemur með Norröna. Svo er okkur kennt um!
Tekjur af erlendum ferðamönnum – hræddur um að þarna sé verið að oftúlka. Þarna er að mér skilst um að ræða skilgreiningu Hagstofunnar á því sem kallast ferðaþjónusta og þarna er líka innifalin velta ferðaskrifstofa af sölu á ferðaþjónustu til íslendinga svo eitthvað sé nefnt. – En það má afvegaleiða alla umræðu og í því eru íslendingar sérfræðingar. Ég er að tala um þann hóp erlendra ferðamanna, sem kemur til landsins með ökutækin meðferðis og ferðast hér um allt, leggur bílunum yfirleitt ekki á tjaldstæðum, losar skolptankana í læki og ár út um allt, ekur þar sem því sýnist og eins og því sýnist og tekur ekkert tillit til íslenskra laga og reglna, enda er þeim ekki framfylgt gagnvart þeim. Við gerum okkur öll ljóst að lokaður vegur er lokaður vegur, en þá spyr ég, af hverju er ekkert gert í því að framfylgja þeim reglum nema gagnvart okkur íslendingum sjálfum? Og ekki að snúa út úr, auðvitað eigum við að fara eftir þessu og langflest okkar gera það.
Vafalaust er maður bara illa gefinn, en manni er samt ekki ljóst hversvegna það er í lagi að erlendir túristar spóli sig áfram í bleytu og drullu á fjallvegunum löngu áður en Vegagerðin opnar þá, björgunarsveitir þurfa að nálgast allskyns smábíla á ótrúlegustu staði. Nú, sumir koma á fjórhjóladrifsbílum og sumum stórum og þungum og þeir fara það sem þeim sýnist og segja bara hróðugir að íslenskir vesalingar kunni ekki að keyra í drullu. Það er eins og það komist ekki til skila að reglur séu til að fara eftir þeim og lokanir okkar á hálendisvegum séu partur af náttúruvernd. Svo vantar algjörlega að gera þetta fólk ábyrgt gerða sinna, ekki hef ég heyrt af því að Selfosslögreglan sekti erlenda ferðamenn, hvað þá hinir sektaglöðu á Blönduósi. Ég hef heyrt að samtök ferðaþjónustunnar vinni gegn því með öllum ráðum að það verði settar reglur um akstur á lokuðum leiðum því það hafi svo slæm áhrif á businessinn. En ég spyr nú bara: Hver græðir á þessu ferðafólki, sem kemur með bensínið og matinn með sér og kaupir ekki nokkurn skapaðan hlut hér og veldur bara kostnaði? Hverskonar dulur eru í samgöngu- og dómsmálaráðuneyti að setja ekki um þetta reglur sem hægt er að fara eftir, ef það er það sem vantar? Ég reyndar efa að reglurnar vanti, allavega eru heimildir til að sekta og dæma íslandsmanninn.
Já, Hilmar formaður, Þakka þér fyrir síðast. Maður er þorði ekki að raka sig í morgun, var of feiminn til að horfa framan í sjálfan mig ……..eða þannig.
En okkar hópur klikkar ekki, alltaf til fyrirmyndar!
Þeir eru báðir flottir, bíllinn og eigandinn!
