Forum Replies Created
-
Replies
-
Takk Sveinbjörn fyrir hlýleg orð í minningu Ómars.
Vinskapur okkar Ómars nær langt aftur og átti ég margar ánægjulegar og eftirminnilegar samverustundir með honum, bæði í hvers kyns ferðalögum um landið og heima við. Oft leitaði ég til Ómars með stór og smá mál og ávallt var hægt að reiða sig á greiðvikni hans og fórnfýsi og það með bros á vör. Þá var lundarfarið eftirminnilegt, en hann hafði gott lag á að sjá björtu hliðarnar á málunum. Stundum hef ég haft orð á því að þegar við vorum á ferðalögum og þurftum einhverra hluta vegna að fara um bæjarhlöð, tún eða heimreiðar, var Ómar jafnan sá sem sá um svo viðkvæmar samningaviðræður. Og það brást ekki að eftir nokkra stund, gátu þó verið mislangar, voru jafnvel hinir óárennilegustu bændur farnir að hlæja með Ómari og okkur voru allir vegir færir. Ég fékk það aldrei almennilega upp úr honum hvaða aðferð hann beitti við slíkar viðræður, en gat mér þess til að ljúfmennska, þolinmæði og tilgerðarlaus lífsgleði hans hefði komið þar við sögu.
Um leið og ég votta aðstandendum samúð mína, tek ég undir orð þín Sveinbjörn, að hans verður sárt saknað, en minning hans lifir.
Friðrik H. Friðriksson
Ég naut þeirrar gæfu að kynnast og starfa með Pétri í sjúkrafluginu.
Votta aðstandendum hans innilegrar samúðar.Friðrik Hermann Friðriksson
Ég skil vel þitt sjónarmið Óskar og tek heilshugar undir með þér að tæknin auðveldar okkur lífið, en á sama tíma verðum við kannski eilítið værukærari. Mín skoðun, sem byggir vonandi á einhverri reynslu, er samt sú að þetta sé ekki jafn bráðnauðsynlegt og látið er með, að því gefnu að hópurinn sé samheldinn og skipulagður í samræmi við búnað og aðstæður, jafnvel í linnulausri stórhríð. Ef við gefum okkur það sem dæmi að GPS-tæki bili, sem kæmi varla nokkrum manni á óvart, ætti þá viðkomandi að hætta eða snúa við? Ég held ekki, þetta gæti jafnvel verið mesti reynsluboltinn í hópnum og þess vegna á öflugasta bílnum – eða ekki. Næsta krafa verður kannski sú að allir verði með tvö GPS tæki með sér, en þurfi ekkert endilega að þekkja höfuðáttirnar eða veðurhæð! Nú er það svo með öll tæki að mönnum gengur misvel að tileinka sér notkun þeirra og þetta á vissulega við um GPS, það þýðir samt ekki að mínu viti að þeir hinir sömu verði útilokaðir frá ferðum, að því gefnu að vera í hópi með einhverjum sem er með staðsetnigarbúnað og kann að nota hann. Mér þykir hér einfaldlega gengið of langt í forsjárhyggju og þætti mér skynsamlegra að fræða menn um kosti þess að vera með slík tæki, eins og þú reyndar gerir og í framhaldinu að höfða til skynsemi og þekkingu í hverjum hóp fyrir sig. Reyndar er það svo að ég kannast við einstaklinga sem gengur illa að tileinka sér notkun þessara tækja, en hafa marga aðra mikilvæga kosti þegar kemur að náttúrunni og jeppaferðum. Ég vildi ekki fyrir nokkurn mun skipta þeim út fyrir einhvern sem kann á GPS, en kannski ekki margt annað í þessu samhengi. Þetta gæti flokkast undir það að saman koma einstaklingar með mismunandi reynslu og þekkingu og saman mynda þeir öflugan hóp. En kannski er aðalatriðið þetta, að ef í hópnum er bíll eða bílar án GPS þarf vissulega að hugsa fyrir því og haga ferðalaginu í samræmi við það og það vil ég meina að sé auðveldlega hægt.
Gaman að fylgjast með þessum þræði, enda um margt fróðleg umræða.
Þrátt fyrir að hafa ekki verið í þessari ferð langar mig að minnast á nokkur atriði varðandi staðsetningarbúnað annarsvegar og fjarskipti hinsvegar.
Þegar menn ferðast saman í hópi, get ég ekki séð að það sé bráðnauðsynlegt að allir séu búnir GPS-tækjum. Að mínu viti ætti að duga að nokkrir eða einhverjir í hópnum séu búnir slíkum tækjum og geti þá lóðsað restina ef og þegar þess þarf. En að sjálfsögðu er þetta bundið við að menn haldi þá hópinn. Það er ekkert voðalega langt, allavega ekki margir mannsaldrar, síðan þessi tækni varð almenn og menn voru jú löngu farnir að ferðast um okkar litla land áður en það gerðist. En vissulega má segja að betur sjái augu en auga að þessu leyti. Varðandi uppsetningu tækja þá er það orðin viðtekin venja meðal notenda GPS-tækja að nota WGS 84 viðmið (map datum) og kannski ágætt að menn athugi hvort tækin séu ekki sett þannig upp. Það er einnig orðið nokkuð algengt og sennilega algengast að hnitakerfi jarðar, breidd (latitude) og lengd (longitude), séu gefin upp í gráðum, mínútum og tug-pörtum úr mínútu, með einum eða fleiri aukastöfum, allt eftir því hversu nákvæmar stasetningarnar skulu vera. Persónulega tel ég tvo aukastafi, þ.e. hundruðustu parta úr mínútu, meira en nógu nákvæmt þegar gefnar eru upp staðsetningar. Það má kannski segja að staðsetningar gefnar upp í gráðum, mínútum og sekúndum séu á undanhaldi, þó að það form hafi ekkert með nákvæmni að gera og geti verið allt eins nákvæmt og hið fyrrnefnda. Þegar gefnar eru upp staðsetningar er ávallt breidd (latitude) gefin upp fyrst og þá lengd (latitude) – sem sagt breidd og lengd, en ekki öfugt eins og heyrist gjarnan núorðið. En eflaust er nú farið yfir þessi grundvallaratriði og miklu fleiri á námskeiðum klúbbsins.
Varðandi fjarskiptamálin er tvennt sem ég vil bæta við það sem fram hefur komið. Í fyrsta lagi teldi ég það athugandi að klúbburinn úthlutaði einni rás sem nokkurs konar uppkalls- og neyðarrás. Þ.e.a.s. að ein rás væri tileinnkuð uppköllum og neyðarviðskiptum, ekki ólíkt rás 9 (minnir mig) á CB og rás 16 á "marine-band". Þetta hefur oft komið upp í hugann þegar maður mætir, eða veit af einhverjum á svæðinu og vill kalla viðkomandi upp, en enginn leið að vita hvar hann hlustar… Margar stöðvar eru búnar svokölluðu "Priority Channel Scanning" og/eða "Dual Watch", sem gerir þetta nokkuð fýsilegan kost. A.m.k. teldi ég þetta skoðunarvert. Í öðru lagi held ég að það sé alltof algengt að menn séu ávallt með (VHF-) stöðvarnar stilltar á hæsta sendistyrk, þrátt fyrir að engin þörf sé á því. Ég er sannfærður um að verulega er hægt að draga úr truflun með því einu að lækka sendistyrkinn.
Hér ein af spurningunum endalausu…
Hver er reynsla manna af 38″ (x15) Super Swamper SSR versus AT405 og/eða öðrum fáanlegum dekkjum í þessum stærðarflokki? Fróðlegt að heyra álit manna um kosti og galla á vegum og vegleysum…
Eftir að hafa kynnt mér frumvarpið lítillega, sé ég ekki betur en að orðatiltækið "betra heima setið en af stað farið" eigi vel við. Og jafn kaldhæðnislega og það hljómar, má kannski segja að það sé akkúrat það sem frumvarp þetta boðar. Samkvæmt þessu frumvarpi gæti vinsælasti útilegustaður framtíðar orðið "Hulduhöfði".
Ég hefði einnig áhuga á að fá nýlegar upplýsingar af þessu svæði.
Tölvupóstfang fhf@vortex.isKv.
Friðrik
Takk fyrir það, þú hefur væntanlega farið inn Blöndudalinn?
Vel þegið ef einhver gæti frætt mig um færð, færi og snjóalög á Kjalvegi norðan Hveravalla?
Smalamenn standa þá væntanlega í hópum við "hálendislínuna" í haust og kalla; gibbagibbagibb….?
…ískaldan með smörrebröd beint frá DK…
Erum við það ekki allir (öll), eins og annar góður maður sagði.
[attachment=2:1yda3uzi]IMG_7162_3.JPG[/attachment:1yda3uzi][attachment=1:1yda3uzi]IMG_7164_2.JPG[/attachment:1yda3uzi][attachment=0:1yda3uzi]IMG_7170_2.JPG[/attachment:1yda3uzi]
Eftir að hafa fylgst með nokkrum þráðum hér af svipuðum toga og þessum, er ekki laust við að maður verði nokkuð undrandi. Þegar upp kemur gagnrýni á viðbrögð, viðbúnað og framferði aðila, t.a.m. í tengslum við þennan blessaða jarðeld okkar, sem virðist duga til að setja allt á annan endann, rís gjarnan upp nokkurskonar hirð sem ekki má heyra minnst á gagnrýni af nokkru tagi. Dýrkunarfaktorinn virðist oft ansi hár og tekinn fram yfir aðra göfugri eiginleika s.s. skynsemi og rökhyggju.
Ekki er óalgengt að fram komi yfirlýsingar á borð við að loka eigi slíkum þráðum, þ.e. þá sem fela í sér gagnrýna umræðu af einhverju tagi, viðkomandi eigi að skammast sín, séu frá einhverri annarlegri plánetu, séu ekki nógu „jákvæðir“ og svona mætti lengi telja. Þá eru ónefnd þau mjög svo óþroskuðu rök að réttast væri að koma þeim ekki til aðstoðar sem voga sér að horfa gagnrýnum augum á umhverfi sitt, þ.m.t. björgunarsveitirnar. Samnefnari þessara andsvara virðist helst vera sá að ekki eigi og megi undir nokkrum kringumstæðum gagnrýna eða hreyfa við misfellum einstakra aðila og samtaka og bera oft í sér yfirlæti og hroka. Að mínu viti þola andsvör af þessum toga ekki skynsama skoðun, eru í raun fráleit og í besta falli lýsing á barnalegum viðhorfum og ná vonandi aldrei undirtökum í þessum annars ágæta félagsskap sem F4x4 er. Það að líta á umhverfi sitt með lepp fyrir augum og tappa í eyrum er skýrt veikleikamerki hvar sem hópmyndun á sér stað, hvort sem það heitir F4x4, Útivist, björgunarsveit eða samfélög í víðara samhengi.
Og áfram varðandi litla jarðeldinn okkar, þá get ég ekki annað sagt, eftir að hafa heimsótt svæðið, en að það stakk töluvert í augu sá gífurlegi tækjafloti björgunarsveita sem við manni blasti, jeppar, snjóbílar, vélsleðar, fjórhjól og guð má vita hvað. Og allur þessi tækjafloti var á stöðugu iði, a.m.k. allan þann tíma sem ég staldraði við. Hinsvegar voru gestir hinir rólegustu, að stórum hluta vel útbúið ferðafólk sem vissi mætavel hvað það var að gera, en ekki óvitar staðráðnir í að fremja sjálfsvíg um leið og yfirvaldið liti undan. Þarna virtist sem sagt ekki þörf á öllum þeim viðbúnaði sem við blasti og þar með má álykta sem svo, að fullvel hafi verið í lagt og þar með kostnaður umfram þörf eða s.k. „overkill“, sem er reyndar ekki óþekkt fyrirbæri á okkar ágæta klaka. Þá hefur maður heyrt bæði jákvæðar og svo miður góðar frásagnir ferðafólks af framferði þeirra sem eru á svæðinu til að hafa vit fyrir og passa „hina“ óvitana.
Umræða af þessu tagi, jafnvel þó að hún sé gagnrýnin, ætti ekki að drukkna og falla í skuggan af einhverskonar yfirnáttúrulegri dýrkunaráráttu sem vel á minnst, þrífst oft á tíðum vel innan sértrúarsöfnuða og er svo sem ekki ný af nálinni og í raun vel þekkt í mannkynssögunni. Það hvort eða hvar fólk versli, hvort sem það eru flugeldar, matvara eða hvort og þá í hvaða spilakassa menn renni á rassinn er hreinlega ákvörðun hvers og eins og á ekkert skylt við rökræður um ágæti björgunarsveitanna sem oft á tíðum vinna þarft og gott starf og eru vissulega ákveðinn öryggisventill í okkar samfélagi. Engu að síður hafa björgunarsveitir sem og Almannavarnir, sýslumenn og fleiri slíkir, ekki síður gott af gagnrýni og umræðu og að mínu viti oft ekki vanþörf á, enda ekki allt eins heilagt og óumdeilt og ætla mætti af viðbrögðum sumra sem hér tjá sig.
Eflaust eru margir innan F4x4 einnig félagar í björgunarsveitum og er ekkert annað en gott um það að segja. Hinsvegar lít ég a.m.k. ekki svo á að F4x4 sé þar með orðið að einhverskonar útibúi björgunarsveitanna frekar en að klúbburinn (F4x4) sé í eigu eða á bandi einstakra bifreiðaumboða.
Kv.
Friðrik
Ég tek heilshugar undir með þeim sem gagnrýna þessa yfirgengilegu forsárhyggju í nafni öryggis og verndunar fyrir alla hina vitleysingana. Stefna og framkvæmd stjórnvalda, eða öllu heldur stofnana, nefnda og ráða sem hlut eiga að máli, virðist hér komin langt út fyrir rökhyggju og skynsemi, enda verða þau gildi ávallt aukaatriði þegar drottnunartilhneigingar fara að segja til sín. Raunar virðist hér komið ágætis dæmi um hvað gerist þegar hugunarháttur og framkvæmdagleði forsjárhyggjunnar fá og ná að skjóta rótum og enda jafnan á bakhlið kúrfunnar og þá sem ofríki og drottnunarárátta. Kannski má því við bæta, að drottnunarárátta sú sem hér virðist hafa skotið rótum finnur sér ekkert síður farveg í samfélögum sem teljast til nýfrjálshyggju, líkt og hér hefur ríkt, sem og á hinum endanum eins og fram hefur komið að framan.
Síðan verð ég að játa að mér þykir nokkuð sérstakt að sjá fjölmiðlafólk spila með þessu og afar ófagmannlegt af fréttastofunum að senda einstaklinga sem seint verða taldir kunnugir íslensku fjalllendi, hvað þá að vetri til, út af örkinni til að kveða upp úr um ágæti alls þessa og upplýsa okkur hin um hvað okkur sé fyrir bestu. Fróðlegt hefði t.d. verið að heyra fréttaskýringar Ómars Ragnarssonar á þessu.
Og þegar jarðeldur þessi skráist í sögubækur legg ég til að hann verði nefndur „Lokaða Leynigosið“ a.m.k. fer það þannig af stað, hvað sem síðar kann að verða. Síðan get ég ekki annað en tekið undir með ábúendum Glæsistaða neðst í V-Landeyjum (hugsið ykkur), sem gátu ekki annað brosað í gegnum veðurbarin andlitin að þessum látalátum!
Með "Lokuðum Leynigosskveðjum"
Eflaust er þetta sómafólk sem þarna býr og starfar. En það er ekki mjög sanngjarnt af þeim (henni) að slá slíku fram og fullyrða einhliða með þessum hætti og enginn til andsvara. Sjálfur hef ég lengi átt jeppa en verð sennilega seint, til góðs eða ills, talinn ríkur í þeim skilningi sem þarnu var átt við!
Ca 80 ltr farangursbox/geymslukassi óskast.
Upplýsingar í síma 8930656 og/eða fhf@vortex.is.
Friðrik
Hér má kannski finna eitthvað; http://www.fixya.com/cars/toyota/4runner
Og svo má líka benda á þráðinn t4r.org
Tek hjartanlega undir það sem hér kemur fram að eftirlit, aðgerðir og svör opinberra aðila virðast, samkvæmt þessu, öfga- og ofstopakennd og umfram það sem stundum er kennt við almenna skynsemi, enda skynsemi kannski ekkert almenn lengur? Í mínu tilfelli fékk þessi ágæti "hvítþvotta-miði" far með öðrum úrgangi, enda er ég einn þeirra sem tel þróun mála bera vott um vænisýki, sem er kannski að verða almennari í okkar þjóðfélagi en skynsemi (almenn skynsemi er e.t.v. að breytast í almenna vænisýki?).
Svo má nú jafnvel benda þessum opinberu aðilum á að þeir séu á ákaflega hálum ís sjálfir, t.a.m. gagnvart samkeppnislögum og hugsanlega einnig öðrum lögum og reglum.
Það er nú kannski önnur saga en hvað sem öðru líður þarf að koma í veg fyrir viðlíka rök- og vitleysu og hér hefur verið lýst.Ég vil þó líkt og aðrir taka það skýrt fram að landsspjöll eru óásættanleg og koma svona vitleysisgangi í rauninni lítið við.
276c varð fyrir valinu hjá mér m.a. vegna þess að einfalt er að flytja hann milli staða s.s. í heimilistölvuna og þá fannst mér áföst rafhlaða og loftnet kostur (tengist einnig utanaðkomandi orkugjafa/loftneti). Einnig leit ég til skjáupplausnar og lita, bíla-notendaviðmóts (street pilot), mynnis og fleiri möguleika. Hinsvegar tek ég undir að skjárinn mætti vera stærri.
