Næsti félagsfundur Ferðaklúbbsins 4×4 verður haldinn á Hótel Natura þann 2. Desember næstkomandi og hefst hann stundvíslega kl 20:00. Athugið breytta dagskrá.

• Innanfélagsmál
• Ferðamannapassinn
• Stórferð 2014
• Skemmtinefnd kynnir skemmtilega dagskrá
• Kynning á ljósmyndun, Gréta Guðjónsdóttir, kennari í ljósmyndun heldur erindi.
• Myndasýning í boði Jeep gengisins.

Kaffihlé verður um 21:00 og eru félagsmenn hvattir til að fjölmenna í aðventuskapinu.

Afmælisrit Ferðaklúbbsins 4×4 kemur út í byrjun Nóvember næstkomandi en klúbburinn fagnar 30 ára afmæli á þessu ári. Ritið er mikið að vöxtum, 400 blaðsíður í stóru broti, litprentað með urmul af ljósmyndum og allt hið glæsilegasta. Í bókinni er fjallað um sögu klúbbins og einstakra deilda frá upphafi, sögu jeppa á Íslandi, landmælingar og slóðamál, skála ferðaklúbbsins, umhverfis og tæknimál og þannig má lengi telja.

Forsala

Hægt er að kaupa verkið í forsölu með rúmlega 30% afslætti af fullu verði sem er 14.900 kr en áskrifendur greiða aðeins 9.990 kr, auk 600 kr í sendingarkostnað. Verkið verður afhent áskrifendum snemma í Nóvember.

Athugið að þetta tilboð gildir aðeins til 1. Nóvember.

Hægt er að panta verkið með eftirfarandi hætti:

• Með því að senda tölvupóst á skrudda@skrudda.is
• Fara inn á heimasíðu forlagsins, http://www.skrudda.is/ og kaupa það í vefverslun.
• Hringja í síma 552-8866

Skipta má greiðslum í tvennt en þá þarf að taka það fram í tölvupósti eða hringja í ofangreint númer.

Taka þarf fram Fullt nafn – Heimilisfang – Kennitölu – Greiðslumáti

Annar félagsfundur vetrarins verður haldinn á Hótel Natura (Loftleiðum) mánudaginn 7. október kl. 20:00.

Dagskrá fundarins

• Innanfélagsmál
• Kynning á nýrri fjöðrun og fjaðrakerfum
• Vetrarstarf komandi veturs
• Önnur mál

Kaffihlé verður að venju um 21:00.

Nýjir sem eldri félagar hvattir til að mæta.

Stjórnin

Fréttatilkynning frá Ferðaklúbbnum 4×4

27. september 2013

Fagna endurskoðun laga um náttúruvernd

Stjórn Ferðaklúbbsins 4×4 fagnar þeirri ákvörðun umhverfisráðherra að ætla að beita sér fyrir afturköllun laga um náttúruvernd sem afgreidd voru á síðasta þingi.

Ferðaklúbburinn 4×4 vill minna á að við úrvinnslu laganna var lítið sem ekkert samráð haft við stóran hóp útivistarfólks. Það var ekki fyrr en á lokasprettinum sem var ráðist í að lagfæra augljós mistök og ákvæði sem ekki samræmdust nútímanum.

Grunnur laganna er góður og vonast stjórn Ferðaklúbbsins 4×4 eftir því að hann verði nýttur til að byggja upp heildstæð lög um náttúruvernd með sem víðtækustu samstarfi notenda og njótenda náttúrunnar. Það er mat stjórnar klúbbsins að lög um náttúruvernd eigi ekki að innihalda boð og bönn sem enginn skilur né að vera uppsett þannig að hvorki  sé hægt að fara eftir þeim né framfylgja. Ef breið samstaða næst um ný lög um náttúruvernd mun hagsmunum náttúrunnar vel borgið.

Ferðaklúbburinn 4×4 skorar á Alþingi að gefa sér nægjan tíma til að setja landsmönnum sterk og skilvirk lög til verndar einstakri náttúru Íslands.

f.h. klúbbsins,

Sveinbjörn Halldórsson formaður

Afsláttarkvöld verður haldið í verslun Útilífs í Glæsibæ þriðjudagskvöldið 1. Október næstkomandi og stendur það á milli 17:00 og 21:00.

Á kynningarkvöldinu býður Útilíf 25% afslátt af öllum fjalla- og útivistarbúnaði s.s. hlífðarfatnaði, svefnpoku, tjöldum, bakpokum, gönguskóm og öðru sem til þarf. Einnig verða sértilboð og verða þau sér merkt, ekki er afsláttur af snjóflóðaýlum eða GPS tækjum.

Hvetjum félagsmenn til að fjölmenna og næla sér í góðan útivistarbúnað fyrir veturinn!

Sjá nánar í auglýsingu hér að neðan.

Lukkuleikur Skeljungs verður á sýningu Ferðaklúbbsins 4×4 í Fífunni næstkomandi helgi. Félagsmenn sem hafa lykla eða kort frá Skeljungi geta framvísað lukkunúmeri sem þeir hafa fengið í tölvupósti á síðustu dögum og kannað hvort þeir hafi dottið í lukkupottinn.

Sögunefnd er að taka saman efni frá 30 ára sögu klúbbsins. Nefndin óskar eftir að félagsmenn fari nú í safnið sitt og dragi fram úrvalsefni sem er þess virði að sýna á sýningunni og komi því til okkar.

 

Við erum fyrst og fremst að leita að eftirfarandi tegundum af efni:

 

1) Úrvals ljósmyndir sem hægt er að stækka upp og varpa á skjá eða prenta á plaköt. Þetta þurfa helst að vera myndir á stafrænu (digital) formi og í sem bestri upplausn. Myndirnar eiga að vera af bílum og fólki á fjöllum og ekki síður stemmingsmyndir sem sýna töfrana á fjöllum, þ.e. jeppa og fólk í glæsilegu umhverfi. Mikilvægt er að vita hvar og hvenær (a.m.k. árið) myndir eru teknar og einnig hverjir eru á þeim, því meiri upplýsingar því betra.

 

2) Myndir frá fyrri sýningum klúbbsins – Mikilvægt að fá sem gleggstar upplýsingar um myndirnar, hvaða sýningu er um að ræða, hvaða bílar og fólk er á myndinni o.s.frv.

 

3) Myndbönd í góðum gæðum, þ.e. vel tekin og sem sýna ferðalögin og upplifunina á fjöllum. Myndböndin mega vera á VHS formi en þó ekki löng þar sem mjög tímafrekt er að yfirfæra slíkt efni. Best er að fá myndböndin á stafrænu formi og þá helst svonefndu avi formi en þó ekki skilyrði. Myndböndin verða notuð til að varpa upp á skjái á sýningunni og einnig sett í safn klúbbsins.

 

Á sýningunni verður sérstakur salur fyrir sögu félagsins. Þar verður skjávarpi og stólar og önnur aðstaða við hliðina á veitingasölunni. Þar er ætlunin að hafa myndasýningar og myndefni á veggjum. Auk þess er ætlunin að bjóða þar upp á fyrirlestra félagsmanna um jeppa og ferðalög. Þeir sem hafa áhuga á að kynna sig og jeppann sinn eða jeppasöguna sína með skemmtilegum og áhugaverðum hætti eru velkomnir að hafa samband við nefndina.

Í sögunefndinni eru eftirtaldir:

Árni Bergsson, s. 8996948, sigrun@sigrun.is

Eyþór H. Ólafsson, s. 8257101, eho@eimskip.is

Ólafur Ólafsson, s. 6641072, oolafsson@ossur.is

Þorgímur Stefán Árnason (Toggi), s. 8605260, thorgrimur@hs.is

Þorvarður Hjalti Magnússon, s. 8922950, hjamag@rarik.is

 

Hægt er að senda efni með tölvupósti á eho@eimskip.is og/eðahjamag@rarik.is ef ekki er um of stórar skrár að ræða, þ.e. minna en 6 MB eða svo. Annars er best að koma því til okkar á lykli, diski eða spólu eða við nálgumst það til ykkar.

Nú styttist í fyrsta félagsfund vetrarins. Fundurinn verður að venju haldinn á Hotel Natura og verður að þessu sinni í Bíósalnum.

Fundurinn hefst stundvíslega kl 20:00 þann 2. September næstkomandi. Dagskrá er eftirfarandi.

• Innanfélagsmál.
• Kynning á stórsýningu Ferðaklúbbsins 4×4 í Fífunni
• Hlé
• Önnur mál og frjáls umræða.

Hvetjum félagsmenn til að fjölmenna á þennan fyrsta fund vetrar.

Nú fer að líða að sýningu ferðaklúbbsins í Fífunni. 

Af þessum sökum verða haldnir þrír fundir nú í kvöld, 23. Ágúst, í félagsheimili klúbbsins að Eirhöfða 11.

• 17:15 – Sýningarnefndin fundar
• 19:00 – Fundur með starfsmönnum og öðrum sem koma að sýningunni. Þeir sem hafa áhuga á að taka þátt í að aðstoða á sýningunni eða eru áhugasamir um sýninguna eru hvattir til að mæta.
• 20:00 – Fundur með nefndum

Hvetjum sem flesta til að mæta. 

– Stjórnin