Réttaröryggi ferðamanna ógnað

Ferðaklúbburinn 4×4 gerir alvarlegar athugasemdir við ýmis sjónarmið sem fram koma í Hvítbók sem nefnd á vegum umhverfisráðuneytis, um endurskoðun náttúruverndarlaga, hefur unnið.  Telur klúbburinn að réttaröryggi þeirra sem kjósa að fara um náttúruna öðru vísi en fótgangandi sé stórlega ógnað ef tillögur nefndarinnar ná fram að ganga. Hætta sé á að stór landsvæði verði með öllu lokuð fötluðum, öldruðum, fólki með ung börn og öðrum en þeim sem ekki hafa líkamsburði til að ganga langar leiðir.

„Við gerum einnig alvarlegar athugasemdir við skipan nefndarinnar en hún er eingöngu skipuð fólki sem vill takmarka verulega aðgengi almennings að landinu í nafni náttúruverndar. Slík skipan nefndar er dæmd til að skila niðurstöðu sem miðast við skoðanir og hagsmuni þröngs hóps í stað þess að endurspegla vilja og skoðanir alls almennings. Þá er ljóst að þessi nefnd hefur ekkert samband haft við stóran hóp náttúruunnenda innan t.d. SAMÚT. Ekki var heldur leitað eftir athugasemdum frá fjöldasamtökum ferðafólks á borð við Ferðaklúbbinn 4×4 sem telur um 5.000 félaga. Okkur er kunnugt um fjölmörg önnur útivistarfélög sem fengu ekki heldur tækifæri til að senda inn athugasemdir,“ segir Hafliði Sigtryggur Magnússon, formaður Ferðaklúbbsins 4×4.

Í athugasemdum Ferðaklúbbsins 4×4 er vakin athygli á þeirri staðreynd að sú meginregla hafi hingað til ríkt í íslensku réttarfari að það sé leyft sem ekki er sérstaklega bannað. Í tillögum nefndar um endurskoðun náttúruverndarlaga er lagt til að þessu verði snúið við og að gerður verði gagnagrunnur um alla þá vegi og slóða sem leyft sé að aka, en fari ferðamaður út fyrir þann ramma, jafngildi það utanvegaakstri og varði við lög. Segir í athugasemdum klúbbsins að í stað boða og banna af þessu tagi, sem kosti mikla fjármuni að fylgja eftir, væri nær að verja því fé til þess að efla fræðslu- og forvarnarstarf og bæta merkingu vega og slóða.

Í tilefni fréttar á vefútgáfu DV í gær, þar sem vitnað er í ummæli um Svandísi Svavarsdóttur umhverfisráðherra á Facebook síðu, vill stjórn Ferðaklúbbsins 4×4 koma eftirfarandi á framfæri:

Eins og flestum mun kunnugt hefur Ferðaklúbburinn 4×4 tekið þátt samstarfi margra útivistaraðila, ferðþjónustufyrirtækja og ferðatengdra aðila um að berjast gegn skerðingu á rétti almennings til ferðafrelsis í Vatnajökulsþjóðgarði.  Í þeirri baráttu hafa menn m.a. tekist á við ráðherra umhverfismála en kappkostað að halda uppi málefnalegum rökum fyrir sínum sjónarmiðum.

Stjórn Ferðaklúbbsins 4×4 fordæmir ummæli þau sem birtust um ráðherra á Facebook í gær og harmar að þau skuli tengd við okkar starfsemi og Klúbburinn þar með dreginn niður á þetta lága plan.

f.h. stjórnar

Hafliði Sigtryggur Magnússon

Nú í vor sendu Ferðaklúbburinn F4x4 og Skotveiðifélag Íslands kvörtun til Umboðsmanns Alþingis vegna staðfestingar umhverfisráðherra á stjórnunar- og verndaráætlun fyrir Vatnajökulsþjóðgarð. Álit umboðsmanns liggur nú fyrir en þar segir meðal annars að staðfesting umhverfisráðherra á stjórnunar- og verndaráætlun fyrir Vatnajökulsþjóðgarð felur í sér setningu stjórnvaldsfyrirmæla. Þegar svo háttar til gilda ekki ákvæði stjórnsýslulaga og þess vegna er umfjöllun umboðsmanns takmarkaðri en ella hefði verið. Umboðsmaður staðfestir hvergi í umfjöllun sinni að málsmeðferð stjórnvalda hafi verið góð eða vönduð. Hann kemst aðeins að þeirri niðurstöðu að hún hafi uppfyllt þær lágmarkskröfur sem kveðið er á um í lögum um Vatnajökulsþjóðgarð.  Ljóst er að félögin hafa ekki fengið jafn jákvæðar undirtektir við umkvörtunum sínum eins og vonir stóðu til. Þess vegna er ennþá  brýnna að standa vel að því samráðsferli sem nú er í gangi með stjórn Vatnajökulsþjóðgarðs.

Stjórnir F4x4 og Skotvís